Northwire 18A 無屏蔽
圖/文: 小瑟
前言 ~
早排日日睇大家既電源線討論, 真係攪到我真係心都痕埋, 唔玩埋一份硬係唔知點咁, 周身唔舒服, 就係咁, 我搵左我既AV盲公竹朋友幫手, 幫我搵左條性價比高到冇朋友既 Northwire 18A 無屏蔽玩, 真係好開心, 佢仲幫我煲練左幾日, 係度真係要多謝佢一下!!
因為我平時見大家既線動不動都100蚊-200蚊一尺…..心諗, 買一條6尺都成千蚊咁滯, 以我呢位”一家三口, 又要供樓”既AV小民來講, 真係投資大左小小, 況且我又唔專業既玩家, 當然希望可以搵又平, 質素又好既線材黎玩下, 試一試係咪真係好似師兄們所講咁有效果啦.
就係咁, 我老友幫我搵左呢隻 Northwire 18A 無屏蔽既線, 加埋MK既英式插頭以完美既手工, 幫我做左呢條又平, 又靚仔既電源線, 等我都可以一嘗[人玩我又玩，唔洗買番版]
(個GAP係爛左小小)
興奮的心情 ~
尋日搵囉線, 之後收工即時飛返屋企, 懷住緊張既心情開始影相, 之後就先囉哂我要試既碟出黎, 用返我現時全部原廠雞線, 聽左一次先…………………………… 唔………….好, 記住呢個聲先
, 之後就黎料勒, 首先我只係換左拖板果條先, 攪左一輪搵出拉入既功夫之後, 插好左勒, 之後就再開機勒. (呢個就係我依家用緊既新德克拖板勒!
)
BLU-RAY逐隻試 ~
首先係聽返 EASON既 MOVIE ON STAGE LIVE 既 BLU-RAY碟先, 就搵出一首我勁鍾意既”黑澤明”來聽下先, 唔洗講, 當然係用最高規格既DTS HD MA來收聽啦……EASON開始唱勒..
….”他不姓黑 不怕黑 選了光 叫最暗黑的戲院 發出光”……人聲出左小小, 不過低音方面唔算好明顯, 畫面就光左小小同利左小小整體改善大約10%左右. 之後因為時間緊迫勒(距離我唔可以炸機既時間越來越近勒
), 我就把心一橫, 將條ONKYO 705既 POWER同套 BLUE SKY 5.1既 POWER都一次過換左佢, 而套 BLUE SKY 5.1仲轉埋直接由牆身插頭取電, 因為咁樣, 應該會有力水好多. 經過左一輪拉拉插插之後, 再開返哂D機, 再 PLAY一次 EASON既”黑澤明”今次……..……..”他不姓黑 不怕黑 選了光 叫最暗黑的戲院 發出光”…WOW…人聲出返哂黎, 鼓聲同所有音樂都終於合返埋一齊
, 再開大聲D, 直頭整個包圍感, 音樂既通透性, 都到左另一個唔同既層次, 而另我最大驚喜既係個低音, 依家終於都唔會再有”胡~~胡”咁聲, 清脆左同收緊哂, 直頭好似人地講, 做左個緊致美白MASK咁, 成個低頻都 FIRM哂, 真係太開心. 呢次投資絕對係超值呀!!!
之後就試埋鄭秀文既 LIVE, 用上 DD TURE-HD聽, 之前其實我都已經好滿意, 換埋線之後更加係連之前聽唔到歌手既拍掌聲都聽得返, 真係大有改進呀!!!
再試我近期至愛”功夫熊貓”夾筷子果段, 當然又係用上 DD TURE-HD啦, 整個音場係包得非常之緊密, 師福轉筷子果下係圍住我來轉既, 係未換線之前既音效都係好有包圍感架勒, 不過尋日換埋線之後, 先知道原來比音樂包得”實”同包得”唔實”既分別, 原來係可以咁唔同, 成個感覺都充實左好多呢!!
之後就到我既偶像人物 “BATMAN 黑夜之神” BLU-RAY勒, 一開始……..音樂由好細聲好陰沈開始, 以前唔覺有既聲音, 依家都聽到了
, 之後轉到 BATMAN到香港捉人果幕, 包圍感都係豐富左, 子彈打出黎D喇叭既控制明顯係從容左, 最重要係 BATMAN把聲, 因為之前既低音比較肥膩, 依家收緊左之後, 佢既對白我都可以聽清楚了, 真係太好, 而係試呢套戲既時候, 更加發現個畫面原來光左好多, 我要即時效返個對比同光暗先得. (提外話: BATMAN IMAX既畫面同NON IMAX既畫面既差幅真係幾大, NON IMAX既畫面 D NOSIE都幾多.
)
之後我就見仲有小小時間, 就囉埋隻新入手既港版”IRON MAN”來試勒, 轉到去佢去打恐怖份子果段, 依家先發覺, 原來呢隻碟真係有問題, 音效既中置既人聲竟然係有幾個地方係”拆拆地”既, 因為我未有其他版本, 所以唔知究竟係咪港版碟先有呢個問題.
再黎就試埋DVD啦, 岩岩問朋友借左套既 DVD版既”赤壁二之決戰天下”, 用上 DTS+THX 來試一下”草船借箭”一段, D箭由後到前咁殺過去, 後置喇都好到位, 估唔到連舊既 DTS都有咁大改進, 感覺個”量”多左, 同埋冇之前既聲咁薄弱, 成個 DTS 既聲底都厚返哂, 再飛埋去”開戰”果段, 由火船衝埋去果D爆炸, 到千軍萬馬蜂擁而上既馬蹄聲, 都另到我六隻喇叭”忙”個不停.
未換線前D喇叭都係”忙”架勒, 不過係好似趕住收工既”忙”, 依家既”忙”, 係好有條理, 有紊不亂咁”忙”, 真係好暢快, 好暢快!! 而我亦都睇到唔捨得熄機.
– 最後, 我老友提左我幾個用新線既要點, 係度又同大家分享下同提醒一下我自己.
1. 一條電源線插上左之後, 頭60小時唔好”蚊”返出黎比第二部機用, 因為電子係有習性, 頭60小時係好緊要.
2. 插左新電源線既器材頭24小時都要著住, 唔好熄機, 等佢可以同條線更有”默契”.
好勒, 分享到呢度都差唔多了, 下次我會開始向BLU-RAY PLAY, LCD TV同其他既器材既電源線埋手, 希望再一次”以我玩得起既價錢, 得到非常超班既質素啦”!!!
**以下之文章絕非專業之評論文章, 只係筆者之個人感覺, 敬請大家留意**
如果你都想同其他版友文流影音資訊, 請到我地既”高清家庭影院與硬件討論區”
http://www.post76.com/discuss/forumdisplay.php?fid=5
