小瑟正副工作都比較忙, 唔係太多時間可以每個月定期去同大家做家訪, 之前好多版友都提出申請家訪, 但全部都係以照顧版友行先的, 直至早排, 終於都清哂手上的家訪申請, 停止接受版友們的申請, 原因就係想先清清手上的老友債, 就以我地藍光版第二把交椅 SonSon 為例, 佢由入職進入 Post76 我地呢個大家庭開始, 就一直升級, 要求家訪, 再升級, 再要求家訪, 最終都係不了了之……..^^”
呢日, 小瑟同九爺同祺哥一行三人, 興之所至, 就即時打電話比住在我們附近的 SonSon, 睇下佢屋企方唔方便, 方便既話就殺上二當家既屋企, 參觀一下我地藍光版版主既屋企究竟係存碟量之豐富係幾咁勁 (起碼對小瑟來講 XDDD).
我地例牌地, 睇睇 Son 爺屋企既器材配置先呢!!
一入屋, 就比 SonSon 一部 xx “既大電視吸引住, 之後就當然係好有霸氣既 KEF Q, 依家大家所見既畫面個 TV 好似好細, 係因為視角問題, 當日我地去到佢度, 老實講, 唔知仲以為係60” 添呀~XDDDD
成套霸氣非常既 KEF Q 系喇叭, 作為呢個家庭影院既主力, 絕不失禮呢!!!
Son 爺多年前購入的 Pioneer VSX-LX60, 到現在依家非常健康, 不過言談之間, Son 已經有了計劃要佢退下火線呢! XDD
而重播音樂方面, Son 爺就以 Shanling CD S100 CD Player 作為音樂既訊源勒.
另外 Son 爺還有一部 Media Player 魅視 M3 看門口的. 照顧非常周到呢.^_^
呢隻 Sub 仔絕對係新鮮熱辣的, Velodyne SPL-1000, 係應該呢個百餘尺既空間絕對應該有餘.
先來熱身聽聽 Son 爺現在系統的效果先, 就以變形金剛3 來做測試, 首先我同九爺都覺得低頻過度豐厚, 中置對白人聲清晰度不足, 而環繞效果亦比較雜亂, 雖然整個音場的 “量” 係非常足夠, 但定位同分析力感覺唔夠平均以一致, 高音同低音非常突出但相對中頻位置欠佳, 導致整體聽感唔舒服及不夠耐聽.
之後當然就係由九爺同祺哥二位負責重做基本的設定呢, 之前 Son爺只係就 Pioneer 自帶 的 AutoMCACC 自動音場效正系統做過一次自動既調校, 而那個 AUTO MCACC 都好聰明地, 知道 KEF Q 仔喇叭開初時, 高音未出到, 所以係 EQ 上高音部份其實佢都加左唔小 dB 的, 不過過左咁耐, Son 爺套喇叭都已經煲到進入狀態, 所以我地先會聽到高音有”爆標”既情況出現, 所以話電腦係死既, 人係生既, 我地上得去, 一定攪亂佢部機先似樣架麻 XDDDD, 就係咁, 我地 RESET 哂 D SETTING, 再重新手動做一次所有 AV AMP 內的調校勒!!!!
(大家可以見到, 九爺呢身打扮絕對街坊, 冇他的, 因為雖然我地係住係二個唔同區份, 不過觀塘去將軍澳, 其實真係好近的呢, 小瑟當日的街坊裝比九爺有過之而無不及呢~~XDDDD)
經過半個鐘左右既設定, 我地就開始搵套戲試下先, 呢次就搵左近來都聲畫表現都理想既 “狂野時速5″ 來做測試, 今次高音部份已經明顯收返唔小, 而中低音方面表現就比之前已經明確左好多, 但依家反而高音部份反而又有小小唔夠, 同埋重低既低頻有小小過大, 對白人聲就變得反而唔太”出”, 比較濛 D, 小瑟同九爺就建議入去設定內的 EQ 部分校校個 EQ 佢勒!!!!
而重低部份, 就要我地既Son爺辛苦小小, 調校多次後面的設定以就返相關既音音同相位問題呢.
就係咁, 再調校多幾次之後, 我地就試返哂之前睇過既 “變形金剛 3” 同 “狂野時速 5” 來試多一次勒. 今次終於都得出一個滿意既效果了, 低頻量感同打心口的效果有力得來唔會肥大, 而最低果陣既包圍感亦都另整個聆聽範圍都感到置身電影當中, 而中置既高音人聲對白又可以向前出返哂來, 解決左中置縮入及對白不清既問題, 而當我地試返老變3 “鐵蛇鎖大樓” 果一幕, 環境中既鐵蛇已經可以生動地重現返包住成間屋一野鎖緊果重金屬爆裂感出來, 在場既 Son 爺都對我地今次既小家訪算係滿意的呢.^_^ 係呢個時間, 我地仲唔係即場屈佢請我地去食飯呀~~~XDDDDDD
(因為要顧全 Son 爺形象, 所以呢張 “影院享受圖” 只可以用 PS 特效, 來阻礙大家欣賞 Son 爺美腿呢個難得一見的機會呢!!!!!^.^)
最後, 小瑟臨走前, 又點會唔為 Blu-Ray 版既版友現場報導一下我地藍光版二當家屋企既藍光軍火庫呢, 小瑟見到呢個櫃真係好想叫佢介紹一下訂做師父我識, 因為小瑟都想左整一個咁大而又咁 FIT 既櫃來放我的BR碟呢…………..
歡迎進入我們的影音玩樂討論區發表意見.
http://www.post76.com/discuss/viewthread.php?tid=90040
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
http://www.facebook.com/post76
https://plus.google.com/u/0/118072674924924911355
