小瑟同好多76師兄,一樣, 屋企有個大小老細(老婆同小囡), 雖然平時小囡係外婆家住, 但一到星期五晚, 就自然要接返屋企湊, 係呢個情況下, 小瑟就會帶上耳筒, 開著電腦, 去享受一下音樂既樂趣, 輕鬆一下, 但好多時, 質素比較好既耳機都通常有長長既耳機線.
近日Sennheiser 就推出左一部以旗艦級為目標的無線耳機 RS220, 小瑟一聽之下, 非常之有興趣, 事關好多年前, 聽過某品牌的無線耳筒, 方便就好方便勒, 不過音質就……….睇下電視都OK既! 而今次由小瑟一路都幾LIKE下既 Sennheiser 推出無線耳機, 以佢地對音質既要求, 小瑟非常之有興趣去一試究竟現時無線耳機可以出到來的音樂, 是如何的效果呢!!!??
好, 就首先同大家黎個小小開箱先, 小瑟次次都好好彩, 問代理借來耳機好多都係全新的, 今次亦都好彩, 呢隻全新未開的, 今次小瑟又有機會來一個小型開封儀式呢~~~~XDDDDD
機架上主要係顯示輸入功能及電池顯示同開關按鈕, 而此機架當然包括埋差電功能啦!!!!
呢個金屬接觸位, 係有彈弓係入面的, 當放上RS220耳機上去時, 就會自動關機及差電勒~
放上去差電時, 又靚仔, 又唔洗煩究竟個耳機平時放係邊好, 呢個設計小瑟個人幾喜歡呢~~^^
好, 再同大家整多幾個CLOSE UP, 等大家可以睇清楚D先, RS220做工的確係唔錯!!! 頭頂位以真皮製作, 還印上Sennheiser的名字及LOGO, 質感高貴有型!!!!
2.4GHz無線技術
RS 220 貴為廠方的旗艦級為無線耳機, 採用2.4GHz來將無縮壓的數碼訊號傳輸技術, 將訊號由耳機座送到去耳機中, 而官方資料說明最遠距離可達到30～100公尺. 小瑟屋企未有咁大, 而經小瑟測試之後, 將耳機放在書房中位置, 再行到20尺外的洗手間門前(中間未有牆壁情況), 接收及音質完全未受影響, 而再行去廚房位置(約 25尺及有牆阻隔下), 訊號及音質都未有影響, 但再進入廚房後的騎樓位(再多一幅牆)之後, 係二幅牆阻隔之下, RS200終於都接收唔到了. 小瑟屋企總共 600尺空間, 將耳機座及耳機放係一頭一尾既情況下, 基本上使用都冇咩大問題. 另外耳機已內建電池, 官方說明可使用6-8小時, 而當沒有訊號輸入將10分鐘左右, 耳機就會自動關閉.
耳機上, 都有齊所以功能按鍵, 咁大家就唔洗怕下下都要走返去個耳機座先可以控制到個耳機咁無謂啦!!!!!
後方可輸入既端子都唔小架, 基本上都應該滿意到聽歌仔朋友既要求啦!!!!
首試開聲 – 張學友《有個人》粵語專輯
小瑟以電腦 AQ Forest USB線直駁audio-gd NFB-12 dac, 再用Early Bird RCA 作為傳輸, 拿來聽近來非常喜歡一聽再聽的[1999年錄製的張學友《有個人》粵語專輯, 這張唱片係張學友個人在寶麗金時代的最後一張粵語專輯. 錄音質素非常不俗, 就聽一首小瑟最喜歡的第７首《愛你愛到不知痛》, 一開始的鋼琴聲……E~~~~ 喂, 唔係好對路喎, 好多音染, 學友仔把聲都比較偏薄聲而低頻亦都比一貫 Sennheiser 既厚彈低頻風格有著明顯距離………試到呢度, 小瑟放低了耳機了, 開著 footbar, 再ADD返煲機皇一碟, 設定了循環播放…………….之後去訓了!!!!!!~_~
經過了四晚的熱身, RS220 大約都已經工作了約 30小時勒, 呢晚, 小瑟再次帶上RS200耳機, 再一次播返第７首《愛你愛到不知痛》………….係勒…..今次先係似返 Sennheiser 出品架麻, 首先低頻彈性及其圓潤性亦都開始成形, 而開始時的鋼琴音染明顯收細了, 雖然鋼琴琴鍵既質感仲未出現, 不過比起第一次開聲時, 已經明顯係二隻唔同既耳機來了, 不過始終都未算合格, 但小瑟見其煲練30小時左右, RS220已經有明顯既分別, 咁就用返同樣既做法, 再煲多四日吧..^_^
煲RS220呢隻耳機有個地方幾好的, 日頭差好電, 夜晚開機PLAY到佢冇電, 預佢玩到7個鐘, 四日之後, 32小時又攪掂~~~XDDDD 來到第二個四日訓練之後, 60小時左右既煲練, 今次又有咩分別呢??? 都係《愛你愛到不知痛》啦, 咁先有對比架麻, 之前鋼琴聲既音染可以話已經唔再聽見, 而鋼琴既質感亦可以營造出來了, 而最明顯分別就係學友仔既人聲, 張學友既特別既唱腔尾音, 都可以一一聽出, 仲有空間感, 依家終於都可以感到空間感既存在了, 而低頻既彈跳性方式, 反而冇之前咁明顯, 呢個可能係高音出返來而相對減小左低頻有關呢!!
總結
RS200官方訂價係 HKD$4689 呢個中階定位既價錢, 如果大家問小瑟, 如果以同價位, 有冇其他耳機比佢好呢??? 小瑟可以答你一定有, 不過係有線版, 而唔係無線耳機, 而小瑟認為, 現時無線耳機在解決傳輸時的干擾已經非常成熟, 係整個試聽過程中小瑟未有一次試過有感覺干擾或出現沙沙聲既情況出現, 感覺就好似有線耳機一樣, 而係方便性之餘, 亦可以得到一定性既分析力及音樂營造力, 呢點在技術上絕對唔係一件易事呢. 另外如果你係一個心急既人, 小瑟要提提你, 你買左返來唔煲煲佢就聽, 我相信你好快會想賣掉佢, 如果你想賣, 記得係二手區出POST之後, PM通知小瑟一聲呀~~~~XDDDDD
>
歡迎進入我們的影音玩樂討論區發表意見.
http://www.post76.com/discuss/viewthread.php?tid=128874
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
