上年九月, 我地好榮幸可以同Sony合作係佢地既Sony Hi-Res AUDIO 新品發佈會後, 第一時間就攪左場為數100人既激試體驗會, 相信有份到場既朋友, 都應該知道Sony 2013年之後, 唔係講玩笑的, 大家可以見到好多不同既戰線, 都有其新產品出場, 而新產品仲要係配以 Hi-Res AUDIO 既Logo, 無論係形象上同實質既音質上, 的確有著令人”一試難忘” 既感覺, 而小瑟早在活動前, 已經將耳機試聽一篇, 但到今日, 先有時間同大家分享一下, 係 Sony新 Hi-Res世代中, 小瑟認為最令人難以忘記既三件 Hi-Res 神器究竟係咩啦!!
首先真係冇野講, 呢隻XBA-H3絕對係小瑟現時入耳式內, 最期待的一對耳機, 首先H3吸引人之處,，相信唔洗講都知道一定係其設計上用上了Hybrid混合系統, 而所謂的 Hybrid系統就係動鐵與動圈單元既混合體了, 其實就以 XBA-H系列既耳機來講, 其實 H2都已經非常OK架勒, 不過我地呢D有高望高, 最頂級既 XBA-H3又加入新設計既HD Super Tweeter超高音動鐵單元, 而動圈單元設計又上採用左最擅長既16mm液晶振膜動圈單元, 以市面上一係就超貴既價錢, 一係就超唔平衡既水準來睇, XBA-H3今次定價真係嚇小瑟一跳, 我一見個價錢, 只需要 HKD$2,880, 唔係卦…….咁抵玩既???? 不過未開始聽之前, 一於同佢影多幾張沙龍先, 事關我都好想可以慢慢咁欣賞一下H3既體態美呢~XDDDDD (呢篇報導時影既相仲係未入手H3的, 所以相中耳機就係由 Sony借出的, 但係2014年時, 小瑟已經入手了!!!!^.^)
小瑟其實係耳機界, 真係一個幾入門既用家, 事關二年前, 小瑟曾經有位朋友, 手上囉住一部PCM-D50既手提機, 當年小瑟諗, 有冇攪錯呀?? 囉咁大部機出街, 唔好玩啦……XDDDDDD, 當時仲覺得非常誇張, 洗唔洗玩到咁大….點知依家二年之後, 自己不知不覺, 原來已經IPC+AMP+耳機, 都係一舊二舊咁帶係身, 所以真係唔好笑人, 分分鐘可能真係”他朝君體也相同”都唔頂……….講返第二樣另小瑟非常驚喜既, 就係呢部PCM-D100, 小瑟唔算聽好多隨身聽產品, 不過一聽呢部D100就覺得好奇, 平時好多聲都唔會出來既歌, 係呢部機上聽會好多好多平時聽唔到既聲音, D100係上代PCM-D50下代機, 15mm單元雙指向收音咪, 仲要支援DSD FILE, 仲可以錄埋 2.8MHz DSD 聲音, 可播放DSD, Wav, Flac格式音樂基本上都夠哂啦, 另外佢亦有個2倍同4倍 PCM升頻功能呢個升頻對音色既仔細度都真係非常明顯, 想玩 Hi-Res FILE既朋友, 呢部機點都要試一試, 聽一聽, 雖然 Sony聲唔一定人人岩聽, 不過小瑟個人就真係幾岩食……..口味既野, 人人唔同咁啦~XDDDDD
D100用4粒AA電, 非常方便, 最岩唔會成日記得差電既朋友呢~~~
用戶介面一開始真係有小小唔知點用, 可能用慣左Smartphone啦, 成日不自覺地按左個Screen呢~~~XD
全套PCM-D100內就係包括咁多野勒!
老老實實. 呢個毛毛套, 係極之難套入去的!!~_~
先試一下PCM-D100+H3既感覺先, 試聽張學友FLAC版既真情流露, 音樂表現感好Sharp, 結像力非常豐富, 所有音器質感非常真確, 而學友把聲就偏泠, 唔多潤澤感, 但人聲表現到有層次既空間感, 非常干淨, 整體冇任何底燥, 但性格上偏向數碼味,
之後, 小瑟就再下一城, 加多部 PHA-2入去, 實行 D100+PHA-2+H3試下, 不過中間用既線, 都只係原廠雞線, 小小測試, 係咁上下啦~XDDD 再聽張學友FLAC版既真情流露, 音樂一開, 已絕對感覺到空間感明顯地提升, 中高音既定位同圓滑性大大地提高, 而D100本身升頻之後都會有D位有小小吉耳, 但加上PHA-2之後, 成件事舒服左, 順耳左, 尤其以爆棚位既控制力, 真係執得整齊哂, 唔覺唔覺, 小瑟仲聽埋其他歌曲, 一攪又唔見左成個鐘………~_~!!!
總結:
今次呢個分享, 真係拖左成半年先出, 原因其實好簡單, 眼見網上各大高手都已經出哂分享, 小瑟呢D新仔仲出來做咩呢??? 不過既然都做左一半, 又冇理由唔做埋佢啦, 況且, 到今日, 小瑟都依然難此D100+H3比到我既震撼性, 到依家為止, 小瑟仲係非常懷念第一野開MJ時, 聽到好多之前未聽過既樂器聲, 細微既音樂部份係呢套機既演繹下, 小瑟直頭以後係重新編曲版本, 大家一定會問, 車……你講得咁誇, 做咩唔買埋 D100, 只係入手H3先??? 呢個問題問得好, 小瑟只有一關過唔到, 所以冇買到D100, 就係佢機身真係大部, 又好重, 小瑟自問唔係真正發燒友, 我只係一名玩家, 一名唔太多時間聽歌同埋又唔係成日係街既小市民, 而一個月可能都只係有幾日會係街度可能聽到下歌仔, 但如果要囉住呢半件炸蛋來聽歌的話, 小瑟又覺得太累贅, 所以……………………………………..
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=183567&fromuid=4
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
空間感明顯提升
