陳慧嫻係 Post76 既魅力有幾勁，相信有留意開【CD 音樂軟件討論區】既朋友都知，是旦一個討論都有廿多版之長，就可見其威力之大，大家對慧嫻支持度有幾高，就係因為咁，我們 Post76一於唔會令支持我們的網友失望，在5月3日呢個星期六下午，就舉辦了一個【陳慧嫻《By Heart》Hi-Fi 靚聲專輯分享會】，而反應之熱烈，足足有成 90 人報名參加，而今次我們希望可以另更多朋友可以更近距離同慧嫻見面，我們就將活動場地由HiFi房移師到KEF Showroom大廳，所以雖然今趟辦得一場但都可以容納到 60 名76版友一同出席。
而當日主持活動呢個重任，就交由我地Post76之大王，小瑟負責勒。大家可以見到，在活動開始前一小時，好多版友已經到場，為既就係因為可以霸定個靚位，同慧嫻Say個Hi都醒神D咁解。
活動進步倒數階段，小瑟先同大家熱身一下，好等大家都可以以最興奮心情迎接慧嫻進場呢。
慧嫻以一身超閃既造型出席當日既活動，而當日除左請來慧嫻之外，我地當然唔小得請埋監制呢張《By Heart》大碟既監制粱廣權先生（Joesph），一齊同大家分享下做呢張唱片的點滴啦。而活動開始前，就先由小瑟向慧嫻同Joesph介紹一下我地既Post76版友先啦！
一輪掌聲之後，三位就座後就正式開始分享會，小瑟問及慧嫻幾耐無入過錄音室及再次入錄音室的感受時，慧嫻笑言近年只是 「間中」入過下錄音室。然而，這段「間中」經歷也令她十分難忘。例如，她試過到無冷氣的錄音室錄音。即使有冷氣的，其空調裝置也可以嘈到「拆天」，最後只好「侷住」熄冷氣，門半掩的情況下錄音。相對而言，以前寶麗金的錄音室即使唔系最頂級，但亦唔失禮。
對於用以「翻唱歌」 做新碟 《By Heart》的決定，監製 Joseph 表示翻唱歌十分適合慧嫻的發揮，無論咬字、韻味以至各個細節方面慧嫻都能勝任有餘。不過，做「翻唱歌」也有一個煩惱，就是在揀歌手、揀歌的過程要十分嚴謹，也要配合到大碟的主題，制作過程絕不比做一個全新大碟的心血小呢。
而小瑟提及得知慧嫻找來組合（R&K）中的Robynn幫手揀歌一事，覺得好非常好奇，慧嫻說笑地回答是一次她出席R&K 祝捷慶功宴的時候，當眾向 R&K 「攞」歌，這樣他們就點都要應承他啦，而經過了她們這次合作的機會，心中不自覺地有種說不出的興奮。而且，慧嫻自稱已做之前已足功課，熟知她們「A Cappella 式」的無伴奏合唱風格，所以在揀歌合作時都較易達成共識。
對於揀歌的過程，慧嫻說曾與Joseph及多位幕後成員一起討論每首歌曲，歌手風格的利與弊。單是被揀出作「候選歌手」 的 List 其實已超過 20 多人，當中不乏 「阿 Sam」、「B 哥哥」等的年代代表人物。然而，基於歌曲版權所限，部份八十年代的心水靚歌其實未能盡錄，實在有點可惜。
至於在云云那麼多首慧嫻的金曲中，為何要找來舊歌 「花店」 來作「翻唱」呢？風趣的 Joseph笑言慧嫻當年太過「小朋友」 、太「可愛」，所以好像未能交足此歌曲的深層意味。所以，今時今日再演繹時的「成熟」味道將會係這首歌的最大特色。而慧嫻亦提到她當年 (1984) ，唱「花店」時其實覺得此歌的確有點深奧，所以態度上都有點「交到貨就 OK」的心態。最終在 「無咩特別 Feeling」的情況下「為唱而唱」因此味道始終 「爭咁D」。此外，當年誤信他人對「咬字」的見解及放棄對「字正腔圓」的態度都令此歌在當年未能唱出精髓。
全碟中，小瑟問慧嫻「覺得最需要“技巧” 的一首歌?」會是那一首呢？慧嫻同 Joseph 都贊成是「藍月亮」這一首 。而慧嫻解析是此歌的拍子較輕快，而且低音部分也比高音難得多，所以應付起來算是最吃力的一首。 而且，Joseph也表示此歌共用上了慧嫻的十多個Take 作剪輯，即使現時錄音的技術進步了很多，但也需花上了大量精神、時間作整理剪輯。至於真的「一 take 過」的歌目，Joseph 拍心口講過 「梨渦淺笑」一定是「一 take 過」的作品，絕無花假。
內容去到呢度，大家都見慧嫻全程真的非常暢所欲言，無所不談，而難得的是，慧嫻絕對係有問必答，仲答而必真，每個問題都係用心回答，亦都聽得出其＂傳真度＂非常之高，有見及此，我們的小瑟大王亦開始膽大起來，問問慧嫻對於為合Hi-Fi碟一定要唱舊歌的看法，誰不知慧嫻竟然即興地找來環球唱片公司的高層Kelvin上台接受訪問，全場即時哄動起來，估不到慧嫻真係非常玩得，難得難得。
Kelvin接受了慧嫻訪問後，回應其實是希望可以讓一眾小時候未能買唱片的朋友們，到現在已有一定經濟基礎，希望借此可尋回當年令自己感動非常的歌曲，可以重新感動自己，而當然就要有好的音質，方可對得住大家呢。對此小瑟非常之認同，因為小瑟說道自己就是當年好多唱片都只有錄影帶版本，而到現在好多已經不見了，現在正好讓他重拾其情懷呢。
另外大家都非常關心的，就是今次大碟碟名 《By Heart》 是邊個起的及為何有此想法，慧嫻坦言自己想將 「簡潔」，「一切隨心」的概念表達出來，而佢自己亦都對一些外國的這類以清新為主的唱片有一定的鐘愛，如Carpenters，他們的唱片都是以「簡潔」為主，所以一般唱片有的 「影集」「封套照」等都刻意不加入去，希望可以讓樂迷都有一份以歌行先的情懷。而 「耳熟能詳」的歌曲，By Heart 「隨心式」的感覺先至系今次專輯的最大主題。
對於六月份演唱會，慧嫻稱六月份的個唱可能會有「額外」的歌曲出現，所以未必會與 CD 有任何的關聯，但希望可以帶給樂迷們一些小小的驚喜，不過驚喜是什麼呢？慧嫻說講左就唔驚喜啦，而小瑟在場中問及大家是否已經買了演唱會門票後，大家都表示好難買到飛，慧嫻還笑言佢有好量門票在手，大家可以問佢買飛呢。最後，慧嫻也補充說到當電台首播Lonely 一曲後，就連克勤聽過都不忘 Whatsapp 讚好，因此有 CD 係手的粉絲一定要第一時間聽哩首先。
分享會去到呢度，其實我地已經同慧嫻傾左成個半鐘頭了，而我們4月份時，在討論區上玩了一個名為【陳慧嫻《By Heart》音樂旅途 … 歌名串連故事創作有獎遊戲】，得勝的三位版友alleelarry，teddyng637，verdy 分別可以即場得到由慧嫻親手頒贈的大碟《By Heart》，真係別具意義的呢。
之後我們 76 就由大王代表，特意送上刻有以Swarovski水晶砌出慧嫻英文名的英國品牌，MAK’SCHEDULE 76 特別版銀包一個，作為是次分享會的一份小小紀念。
之後當然就係去到大家最緊張既環節啦，就係簽名會時間勒。大家當然好緊張想知點樣可以囉返自己同慧嫻既合照啦，如果想要回合照原檔相片，大家只要登入系統 PM 小瑟 ，小瑟會比 LINK 大家下載原檔的呢。
後話
今次分享會絕對係我們76攪的星級活動中，超時超得最耐既一次，難得慧嫻貴為天后級人馬，不但沒有任何明星架子，更加係有問必答，而分享會中更加有好多另人爆笑位係由慧嫻發放的，但礙於文字所限，未能一一盡錄，不過大家唔洗失望，我們會係明天開始一連三日，為大家送上【陳慧嫻《By Heart》Hi-Fi 靚聲專輯分享會】實況足本，好等大家都可以再三感受慧嫻當日之風采。而會後小瑟都對慧嫻讚不絕口，其親切及爽朗的為人，的確另當日分享會加添200%歡樂氣氛，我們Post76亦再三預祝慧嫻在六月份的演唱會，加幾多場都爆到七彩。
陳慧嫻《By Heart》Hi-Fi 靚聲專輯分享會預告
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
https://post76.hk/forum.php?mod=viewthread&tid=188135
<
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
