OPPO HA-2唔知推出左街未, 不過聽講都有人已經入左手, 而小瑟都係今日先到手, 但坊間已經好多開箱文, 所以就唔賣弄開箱之技倆勒, 不如拿拿林直接進入試聽部份, 小瑟岩岩先開箱, 借左老婆部 iPhone6, 我自己部 Sony Z3試試效果先.
先試 iPhone6 + HA-2 + Denon D7100 聽《譚詠麟 – 銀河歲月》第一版
用IP6接上HA-2, 真係非常簡單, 一插好, SET 好機底下的輸入為 “A”, 再用IP6平時聽開的DS AUDIO(因為方便係屋企NETWORK聽歌)開出校長新碟第六首《傲骨》來聽下先, 呢首係成隻碟中, 最鐘意拿來試機的, 因為貪佢動態大, 一開頭又細膩, 而到最尾就澎湃激昂, 正呀!!!! 一開機即時對應有聲冇哂問題, 首先一輪結他清脆利落, 爽快唔痴地, 到校長開聲小瑟就開始校大聲小小, 點知原來再校多小小, 已經到頂, 盡大聲了, 其實都ok架勒, 只不過小瑟想埋身D, 再震撼D咁, 整首歌都聽得非常肉緊, HA-2比到小瑟最深感覺係個低頻, 唔痴底, 一上一落控制力非常到位, 當然去到超大爆棚位就輕微亂亂地既感覺, 不過以佢一部手提耳擴來講來推D7100已經非常唔錯, 起碼聽到佢控制到D7100七至八成的穩定, 唔錯唔錯!!!!
∇同場加映 iPhone5C 合照
再試 Sony Z3 + HA-2 + Denon D7100 聽《譚詠麟 – 銀河歲月》第一版
用 Sony Z3來接 HA-2, 好明顯呢部 HA-2係設計冇預同 Sony玩遊戲啦, 成個 Design明顯係唔受 Sony 機玩, 你睇我插完之後………用來劈邪就岩哂, 十字架咁唔洗旨意出街渣得好啦……..XDDDD, 之後再試返用 DS AUDIO來聽歌, 死火, 得電話有聲既?? 明顯係對應唔到了, 再檢查一下機底的輸入, 明明已經轉左”B” 架勒喎, 都係唔得, 最後小瑟就用返之前買落的 USB Audio Player PRO 軟件出來, 好彩, 佢終於都搵到部 HA-2勒, 好, 等小瑟再一次搵返同一首歌來聽下先, 一開聲, 小瑟就已經知, 聽歌都係冇得講, 一比較之下, iPhone 6出黎既聲係比 Sony 既聲底干淨, 靜, 爽朗好多, Z3出來效果都仲係太POP, 唔夠干淨, 就咁聽左一陣, 就好快熄機收工了!!!!
∇唔插線時都未洗輸的, 一插………個樣輸哂!!!~_~
結語
真係好耐都冇試過即晚就試完機拿拿林出聽感比大家睇, 因為平時都希望可以做得更仔細, 做得更豐富, 所以時間真係會耐好多, 唔知大家又鐘唔鐘意小瑟呢D即興快速REPORT呢?? 言歸正傳, HA-2小瑟聽左一陣, 暫時既感覺係佢都幾好野, 細細部其實都幾好力, 起碼推度D7100都叫似模似樣先啦, 另外一個好大既感覺就係佢味精真係超小, 以忠實音色為主, 你個SOURCE係點佢都會比返咩你睇, 呢個真係OPPO音響不嬲既性格, 鐘唔鐘意見仁見智, 不過唔鐘意玩EQ, 心理上係最愛原汁原味的朋友應該會幾受落, 另外如果你係 IP6用家, 呢野HA-2真係冇乜得點輸, 成個設計, 無論外型, 對應, 音色都係完全為 IP6度身訂製, 如果你已經有IP6又想為 IP6既音樂效果達到更Hi-End的境界, 相信HA-2你應該搵日拿上手試試呢!!!!
∇來個反高潮比大家…登登登……開箱圖 XDDDD
∇左紙盒之後, 就係呢個靚靚卡紙包裝呢.
∇老實講, OPPO 的包裝, 的確唔錯, 可以做出一重高貴的感覺…….盡管佢只係用卡紙~~XDDDDD
∇呢個插頭…一睇就知係似咩啦!!!!
∇二條橡皮圈, 一條比iOS器材用的數碼線, 一條比 Android OTG USB線, 一條模擬信號接線, 一條長USB差電線, 係咁多!!!
∇其實好多手提機都係指示上唔多下功夫, 但HA-2好就好在佢真係唔洗你睇說明書都識哂點用, 呢點的確係唔錯, 冇計…小瑟真係好怕慢慢睇說明書呢!!
∇想知仲有幾多電?? 好簡單, 按一下圓形既制就會有顯示, 好方便. 另外想再加D低音咩?? 又得, 效大個 Gain 比耳機咩? 亦得, 不過小瑟試過加Bass, 感覺即刻冇咁爽, “立”左小小!!!
∇看圖識字, A就係iOS, B就係 Android的, 夠簡單勒掛!!!XDDD
∇同場加映HA-2肉照一張^^”
後話
呢幾日小瑟仲會拿住部HA-2用下, 試下煲煲佢又會有咩唔同先, 如果大家都有興趣想一同討論HA-2, 就去本文下的”本文章”內的討論串留意下勒!!!^.^
