從前……港產片廣為華人熟悉, 有華人的地方, 就有香港電影嘅影蹤, 被譽為東方荷里活的它, 是風靡全球, 成為香港文化的標記!
現在……港產片已經歷了長期萎縮, 不單在香港, 在全球其他地方嘅觀眾數目都大幅減少, 加上近年港片紛紛活在合拍片的[外殼]下生存, 港產片的風格, 而非走向本土 !
將來……日後的香港及香港電影, 定將會面對更大的逆境及挑戰, 但香港電影從來都以無窮創意及靈活頭腦去面對逆境及挑戰, 永不言敗 !
香港人的精神更是自強不息, 遇強愈強, 這就是香港, 這就是香港電影!更以透過今次訪問, 送給每位喜歡香港電影的您……
嘉賓簡介 : 錢小豪先生, 由70年代尾拍攝電影工作至今, 演出超過一百部電影, 亦參與電視劇集及從事導演工作, 也是正宗港產片”殭屍先生”佼佼者他的武打動作片, 更是深入人心, 他絕對夠資格談論香港電影!
C代表 : Collection
小豪代表 : 錢小豪
C : 香港80年代電影係最輝煌, 可唔可以講下其實有幾勁 ?
小豪 : 喺有幾勁吖?! 其實唔止80年代, 當然80年代就所有提材港片都百花齊放, 包括商業 / 藝術電影都大收嘅, 但相對香港電影其實70年代開始已經好勁 !
C : 嗰時係70年代尾 ?
小豪 : 70年代頭 , 可能你未出世, 其實嗰時已經好多香港電影受外國人歡迎, 我一講個名, 大家都耳熟能詳, 就係李小龍, 佢1973年死, 佢71, 72年d戲好受歡迎, 另一個張徹導演la, 佢d戲亦好受歐洲歡迎!
(李小龍/張徹 相片)
C : 獨臂刀 / 刺馬嗰d !
小豪 : 無錯! 佢係香港剛陽新派武俠浪潮嘅佼佼者 ! 另外當時新浪潮文藝電影一樣大收 !
C : 文藝電影有乜 ?
小豪 : 許鞍華嘅投奔怒海, 譚家明嘅愛煞, 嚴浩嘅夜車……呢d當時喺香港都好受歡迎, 商業片就更加唔駛講!
C : 成龍, 洪金寶嗰班 ?
小豪 : 唔止大哥佢哋, 徐克嘅新蜀山, 殭屍系列個d, 嗰時真係歌舞昇平, 不過再商業d就要講喜劇 !
C : 喜劇原來再商業d ?! 真係唔講唔知 !
小豪 : 嗰時就James Bond式喜劇, 最佳拍檔好勁, 又機械人又改裝車, 總知就好大堆頭, 重有另外一d小品式亦好受歡迎, 就係洪金寶嘅福星系列
(五福星 相片)
C : 五福星馮淬帆, 吳耀漢佢哋 !
小豪 : 係喇! 即係果嗰班底你哋係會記得嘅, 雖然冇飛機又冇改裝車, 又唔係大堆頭, 但就以動作為主, 個個都[冷坦]嚟嘅, 有d鹹濕嘅, 有d古惑嘅, 有d攪笑嘅, 其實好有趣味性, 係80年代比我最深刻感覺就係所有電影都係得嘅, 好睇嘅 !
C : 咁80年代香港電影最盛世係由嘉禾, 新藝城帶頭, 當年鬥得難分難解, 哥唔可以講下佢哋鬥得有幾燦爛 ?
小豪 : 有幾燦爛呀 ? 其實又咁講嘅, 新藝城個邊用科技對嘉禾d動作片, 講動作片佢就一定唔夠嘉禾撼!
(嘉禾, 新藝城 相片)
C : 嘉禾一定係成龍, 洪金寶打哂!
小豪 : 成龍, 洪金寶本身d戲已經鬥得好勁, 重有袁和平呢! 當時動作片真係嘉禾嘅天下, 嗰時成龍d戲真係好勁, 二三千萬濕濕碎, 咁新藝城用咩可以打低成龍呢? 佢哋就用創意去打嘉禾嘅戲, 即係諗個阿Sam配麥嘉, 一個詼諧一個靚仔, 再諗下機械人呀, 又捉下英女皇呀, 最佳拍檔就係咁爆出! 咁新藝城另一樣可以打嘉禾嘅就…不過又咁講, 嘉禾除咗成龍, 洪金寶之外, 唔係話佢哋拍得唔好睇, 但嘉禾比較有深度d嘅戲係唔多! 因為此終商業片呀! 此終要動作輕輕鬆鬆, 要成龍諧趣式咁打, 咁反而新藝城佢哋會諗第二d題材去打! 例如搵徐克拍鬼馬智多星, 刀馬旦呀! 黃百鳴又有開心鬼! 吳宇森拍英雄本色呀! 咁就可以打嘉禾呢個弱點, 同埋新藝城本身動作演員唔多吖嘛, 有都比嘉禾立哂!
(最佳拍檔 相片)
C : 嗰時嘉禾會唔會著數d ? 佢有自己院線!
小豪 : 係嘅! 會有院線係會著數嘅, 即係邊個檔期最好, 佢都可以安排自己d戲上, 不過新藝城都會有個麗聲院線, 嗰時佢都會搵d好檔期上, 不過你講上當年一定嘉禾院線好d la, 龍頭戲院佢分到每個大區都有, 旺角呀, 尖沙咀呀, 相對麗聲院線d位就弱d
(嘉禾院線, 麗聲院線相片)
小豪 : 以前就係咁鬥, 無話唔夠撼嘅, 你嘉禾動作勁咩, 我就用輕鬆愛情片打你, 到新藝城輕鬆小品勁嘅, 我嘉禾就用攪笑恐怖嘅殭屍先生, 江湖龍虎鬥嘅情義動作個d撼番你, 當時就係咁互搶觀眾, 創意無限咁鬥 !
C : 嗰時香港電影最蓬勃嘅日子, 好多藝人都同時接數齣電影, 鄭裕玲小姐更被稱為<鄭九組>你哋藝人以前係點爭取時間拍戲架 ?
小豪 : 係架, 其實當時80年代真係最蓬勃, 無論大公司邵氏, 嘉禾…甚至乎背後個d分公司, 子公司全部都開戲, 簡直雨後春筍嘅獨立公司仔都話開戲 ! 咁嘉禾又有分公司寶禾, 威禾個d, 個時係好多元化, 間間都搵演員拍戲!
C : 嗰時搶演員搶得好利害架嘛 !
小豪 : 係架 ! 個時搶阿周潤發, 劉德華呀, 重揸埋手槍去搶, 你直頭唔拍都唔得, 嗰時個個都已經幾組係身, 重要搶來搶去! 你都應該聽過呢d新聞 !
c : Sorry, 呢度我插一插先 !
小豪 : 唔 !
C : 據我知香港電影本身係從來都無資金, 所以當一有投資者比錢投資嘅時候, 導演係唔會理投資者乜身份, 就會照應承拍, 所以就吸引咗一d黑社會想搵錢已入侵電影圈!
小豪 : 係, 但呢樣嘢全世界都會發生, 連荷里活都會發生, 但盜亦有道, 有d直頭係連資金都唔想有, 嘩! 呢期劉德華出面紅喎又賣到埠, 搶個劉德華返嚟拍, 跟著同人講你部戲有劉德華拍緊, 賣埠東南亞又有錢收, 咁佢咪乜都無囉出嚟就收錢, 有d係咁做, 嗰時其實幾[烏哩單刀] !
C : 咁嗰時就引發電影圈好多暴力事件, 之後電影圈亦發起大遊行呀 !
小豪 : 係! 咁當然有燦爛一面就有黑暗一面, 呢個世界就有呢樣哲學係咁 ! 一定係有靚嘅一面, 就有另一邊唔靚 !
(電影圈大遊行 相片)
C : 好! 又返番去一日趕四五組戲個問題度 !
小豪 : 好 !
C : 咁嗰時你哋係呢個片場拍幾個鐘, 跟住又走去另一場拍幾個鐘 ?
小豪 : 係架 !
C : 嗰時d片場集中係一度 ?
小豪 : 唔係架 ! 拍到係架車度瞓, 嗰時又唔係富裕, 無話有司機架嘛 ! 咁咪自己揸車趕去片場, 未輪到就係架車度瞓住等, 到要拍就落車拍, 拍完又揸車趕去下一場!
C : 咁嗰時直頭無得沖涼, 無得換衫 ?
小豪 : 都有, 兩三日一次, 咁有時係荒山野嶺就真係無得沖涼!
C : 呢d日趕到夜, 夜又趕到日嘅情況, 你哋藝人係點睇 ?
小豪 : 其實好無奈, 真係唔知點講 ?! 即係話大哥開戲叫到, 唔通你唔去咩, 洪大哥都開戲又叫, 甚至乎台灣王羽大哥開戲叫你去拍, 咁又要飛去, 即喺變咗係咁 ! 即喺有d嘢唔到你決定嘅, 你想話休息下唔拍, 得唔得呀 ? 喂! 唔好停, 呢排興殭屍片喎, 個潮流未完, 快d嚟拍開多幾部先! 就喺咁, 當時心態其實真係幾慘, 日日都係架車度瞓, 嗰時唔似拍戲, 似做苦工(一笑) ! 有次就朝早搭飛機去台灣, 一落機就拍到夜晚, 跟住又搭番飛機返香港拍另一組, 隔一日, 又飛返台灣拍, 即日拍完又返香港, 嗰時孭四五組戲係身 ! 好似君如, 志偉, 佢哋, 一瞓醒就拍, 拍完一個鏡頭即瞓, 忙到要咁樣爭取時間瞓, 嗰時拍到無靈魂, 好似你問志偉知唔知拍乜 ? 佢係會唔知拍緊邊部戲 ! 嗰時由其拍電視劇, 拍劇就更加誇張, 我真係從未試過, 竟然拍劇拍到成個星期未返過屋企, 就係菠蘿斜, 嗰度係專拍古裝片武林聖地, 一組導演又朝拍到晚先走, 跟著第二組導演又從晚拍到朝, 啫係我唔明嗰時話香港都算繁榮, 但其實製作係幾落後 !
(菠蘿斜 相片)
C : 嗰時係80年代d電視劇 ?
小豪 : 80年代初呀 !
C : 講唔講得同邊間台拍 ?
小豪 : 都唔怕開名la, 同亞視, 佢都執笠
(我同小豪都大笑了XDDDD)
小豪 : 就係咁囉, 咁對d演員其實真係唔好, 日日係咁拍, 除非個演員好等錢駛, 咁日拍夜拍更係好la !
C : 又差一差開先, 其實電影同電視拍攝運作差幾遠 ? 你哋拍開電影嘅, 又偏向邊面 ?
小豪 : 其實好因人而異, 我拍電影出身嘅, 我當然鍾意電影la, 但其實拍攝個演繹係好唔同, 真係你做過就知, 原來電視藝員係拍唔到電影嘅, 相反電影嘅人亦拍唔到電視 !
C : 咁怪 ?
小豪 : 雖然大家都係演繹, 但電影每個鏡頭都細緻, 不過都要睇下邊個導演, 王晶嗰d一日拍十場都重得, 王家衞就一場拍三年都得 !
C : 哈哈…係好大分別 !
小豪 : 係喇, 即係點…唔係話d藝員唔好演技, 佢哋一樣七情上面, 不過劇集流程太急, 佢哋係一日要趕拍十場戲, 變咗佢哋用累積嘅經驗, A,B,C餐, 呢場要A餐, 下一場C餐, 再嚟B餐就要去, 電視台無時間比你思考, 就算有得比你諗, 都一定係細思考, 無大思考嘅 ! 因為場數就係定咗要拍咁多, 拍完今日, 第日又要趕拍!
電影就唔同, 又係睇下邊個導演la, 不過講正常拍一部戲, 導演係可以執得好細, 例如可唔可以試下先, 個感覺唔係咁, 不如再嚟試下第二種感覺拍, 拍戲可以同導演咁樣磨, 所以做慣電影個d, 走去拍電視, 唔係嘛…你叫我兩個鐘頭拍三塲戲 ? 但電視台就係咁, 要每日拍十幾個鐘, 巳十幾個鐘入面係講緊要拍幾十塲戲, 相反電影拍一場戲係可以拍三日, 甚至一個禮拜, 就係咁…個量根本唔同, 節奏又唔同 !
C : 咁拍電視劇係講緊一個月, 甚至乎更短就拍好一套劇 ?
小豪 : 又無咁誇, 因為電視劇講緊係兩至三個月要製作好十八個鐘嘅劇集出嚟 ! 每集45分鐘, 當中另外加埋15分鐘比廣告客戶, 咁你係三個月內拍十八個鐘嘅劇集, 同係三個月內拍兩個鐘嘅港產片, 咁你諗下…大家都三個月拍嘅, 邊樣精細d !
C : 講番電影先, 以前80年代港產片成功因素有乜 ?
小豪 : 而家睇番就老土嘅, 但嗰個年代就創新, 不過都要睇週遭因素! 嗰時國內又未開放, 題材又冇, 就算而家嗰d都係抄香港以前嚟拍, 日本市場又萎縮, 係d大導演就ok嘅, 深作欣二 / 黑澤明 / 大島渚…呢d係國際性嘅, 但唔係大導演嗰d又衝出唔到國際 !
(深作欣二 / 黑澤明 / 大島渚 相片)
.
C : 日本衝到出國際性得AV (大笑) !
小豪 : 哈哈……
C : 好, 繼續(馬上扮番認真)
小豪 : 例如諧趣功夫片, 其它地方係拍唔到 !
C : 所以嗰時成龍係日本咁 hit !
小豪 : 啱la, 到台灣個邊, 嗰時台灣人又係無香港人咁創新…好保守嘅, 嗰時台灣戲好”娘” 跟住韓國嗰時又窮, 重戒緊嚴, d韓國片嗰時你真係睇見都驚 ! 馬來西亞, 新加坡又係保守, 咁就形成香港80年代港產片得天獨厚 ! 整個東南亞市場, 甚至乎歐美, 都好鍾意我哋港產片, 不過首先真係要多謝李小龍, 係佢帶領我哋香港電影去到歐美 ! 嗰時好多國家都需要買我哋港產片 !
C : 甚至我記得, 當時香港邊d片種受歡迎, 台灣, 馬來西亞就跟住拍 !
小豪 : 係呀 ! 佢哋跟風拍架, 但就拍得好”娘”個隻 !
C : 明星呢? 會唔會同明星效應有關 ?
小豪 : 明星效應係有幫助 !
C : 嗰時真係有周潤發, 許氏兄弟, 鄭裕玲…….呢d走出嚟, 係有星味 ! 但而家好似無明星 !
小豪 : 而家都有, 但來來去去都係嗰幾個囉 !
(明星相)
C : 但感覺而家d明星弱咗好多 !
小豪 : 其實咪係一個笑話, 今時今日d明星, 都係7, 80年代嘅周潤發, 劉德華, 梁朝偉佢哋 !
C : 近代真係無乜明星 !
小豪 : 而家嗰d邊孭到飛, 係咪先! 最慘係80年代紅到而家都要係佢哋, 後繼無人吖嘛 !
C : 甚至今界最佳男演員劉青雲都係80年代藝人! 後繼無人原因有乜 ?
小豪 : 你都覺得而家後繼無人 ?!
C : 覺得!
小豪 : 可能同生活節奏有關, 好多公司, 由其電視台當d藝人係一種商業產品, 佢哋情願快d推一堆姐仔出嚟, 跟住呢一年套套劇同戲都係佢, 不斷咁催眠d觀眾, 等大家覺得佢係明星 ! 好似劉青雲咁, 個人生係有經歷, 有層次感, 真係識做戲, 其他人係識分咁樣係明星係演員, 其他比電視台推住走催眠個d叫商業產品! 我哋以前電影真係要你拍過幾部戲好睇, d人話你演得, 先可以再有機會, 但而家就催眠你, 呢批唔得又馬上推另一批, 男男女女都係咁做, 所以近年就走咗d另類產品”o靚模”出嚟 ! 嗰個整條事業線出嚟就叫”o靚模”做明星, 講下佢拍過幾多部戲呢 ? 冇 ! 但係佢哋又自稱為明星 ! 即係現在”明星”已經變咗唔係嗰會事 ! 以前我哋拍戲, 一喺你真係好靚仔, 一喺你好好演技, 或者好好身手, 睇到真材實料嘅, 以前得吊”威也”, 無CG, 真係要你二樓, 三樓跳落嚟, 跟住跳到落地再打, 呢d以前大家睇到拍哂手掌!
C : 而家冇人再肯敢博 !
小豪 : 而家嗰班年青人, 拍嘢太陽曬d都話唔好攪佢, 叫個助手同佢遮一遮先 !
C : 哈哈(笑死我) 而家個d似公子, 最緊要set靚個頭, 無哂以前周潤發, 劉德華, 你呀! 你哋以前真係捱出嚟! 同埋近呢好多年, 香港娛樂圈反而變咗跟風人哋, 日本韓國咁, 要有咁細年紀推咁細 !
小豪 : 啱呀! 我都唔明而家點解咁 ? 以前就日本韓國跟我哋題材拍, 唔明香港點解唔用自己優勢, 反而而家我哋抄韓國! 抄韓國做乜呢 ? 我哋d男歌手, 演員, 而家個個扮韓仔!
C : 而家d歌手個個頭都剪到韓國仔咁, 化妝又化到青靚白淨, 面青青咁!
小豪 : 哈哈……直頭韓國人一樣 ! 本來我哋香港電影係有層次嘅, 係有深度, 唔流於表面嘅, 但我哋香港而家新個輩趨勢係抄人, 我唔敢講全部係咁, 但抄緊, 模仿個d就抹殺咗香港電影嘅層次 ! 香港而家最坎坷就係咁, d嘢本末倒置咗, 本來香港電影係得嘅, 有咁多年努力嘅基礎, 香港電影亦擁有一樣好寶貴資產, 叫”自由創作” 因為香港有法例, 有電影三級制, 所以香港電影其實係好有優勢!
國內就冇三級制, 只有得…同唔得, 國內拍嘢其實好無奈, 唔係話佢哋拍得唔好, 國內都有好多好導演, 但係個模式比較保守, 你哋有冇發覺國內電視劇, 係十年內翻拍咗神鵰俠侶四次, 點解兩年幾就要翻拍一次呢 ? 因為國內真係無題材, 同埋你話拍神鵰, 國內唔駛審查, 因為金庸劇本一定過到 ! 其實重有個笑話, 你哋可能睇得太多唔覺, 通常我哋合拍片, 拍民族大義, 一定係打日本仔, 今次葉問, 一個打十個…打完, 下次就馬永貞打, 跟住到霍元甲打, 再跟住用陳真再打, 國內拍嘢最無奈就係呢d, 保守無題材, 換個主角但劇本又一樣, 真係講劇本, 香港真係贏哂, 起碼呢幾年, 你會見到紅Van, 狂舞派, 殭屍呢d香港地道片!
C : 重有3D肉蒲團
小豪 : 哈哈 ! 係喇 ! 國內拍唔到嘅, 佢哋要組團落嚟香港睇嘅, 呢d就係港產片, 你唔好理佢係情色片又好, 暴力片又好, 係咪先! 呢d係國內唔敢拍, 國內就只有重覆又重覆, 唔係拍打日本仔就金庸, 一係就關雲長, 趙子龍史詩式個d ! 你有冇睇過一部國內時裝片係好正架 ?
C : 唔覺, 國內都係古裝片為主
小豪 : 國內市場就無辦法, 佢哋好多題材唔敢接觸, 因為係有政治因素, 香港夠膽拍無間道, 講d香港警察會貪污, 國內 ? 所有公安同高官都唔會貪污咪架嘛 !
C : (大笑) 嗰時無間道係國內上改到 !
小豪 : 此終我哋回歸咗祖國, 國內市場大, 拍攝適合國內口味係無可厚非嘅, 無辦法囉, 即係你要當搵食! 所以你話香港題材幾掂 !
C : 90年代香港電影受到外國欣賞, 演員導演都成為美國灸手可熱嘅對象, 但呢個時候卻諷刺地香港電影, 受到盜版及亞洲金融危機影響, 跌入困境一落千丈, 踏入2000年仍然一厥不振, 可唔可以講下當時情況有幾慘 ?
小豪 : 市道係慘嘅, 有幾慘呀 ?! 呢樣就要講我哋80年代過份興衰, 到90年代又唔珍惜機會, d導演又去哂歐美, 跟住娛樂圈又<嗚哩單刀>, 英雄片一興, 就全部人拍英雄片, 賭片掂…就全部人拍賭片, 攪到拍咗好多垃圾片, 拍到連賣埠個邊都爛埋 ! 人就係唔識得珍惜, 雖然有句說話叫”打鐵趁熱”, 但係打鐵趁熱到過咗份呢, 就自毀前程, 係咪先 ?! 90年代香港電影就係自作自受囉! 而且90年代東南亞市場萎縮, 跟住到中國開放, 一開放就需求大量精英, 跟住國內就搶走一班人, 無論電影, 電視台班編劇, 導演, 演員都上哂國內 ! 香港電影就更加萎縮 !
曾經都好慘, 我記得2000年大陸武夷山, 係台灣投資拍套蜀山, 拍完我返嚟香港, 跟住到2002年呢兩年係香港未拍過嘢, 我嗰時都懷疑下, 見大陸都有嘢拍下, 點解香港無呢 ? 適逢我同導演張之亮傾電話, 講起大家都一樣, 原來香港市場死哂, 只有返大陸先有戲拍, 嗰時就02年, 我同張之亮就返咗北京上海拍劇 !
C : 嗰時都只有電視劇拍 ?
小豪 : 係! 因為香港冇戲拍, d精英上哂國內, 香港邊有人開戲, 嗰時電影死哂 !
C : 嗰時票房都好差 ! 直至捱到2003沙士之後, 就開始好番d, 嗰時真係各行業都無人消費, 跟住政府先開始出招攪下活動, 支持下娛樂事業, 支持下電影, 咁先有番人入戲院 !
小豪 : 香港你唔踢一下就唔做嘢 ! 所以當你就死la, 末期癌症嘅時候就話要救番生你, 當你似劉翔跨欄咁勁嘅時候就無理, 創意工業搵唔到錢 ! 到時等佢就死先話扶持下, 死la ! d精英都離開哂la, 係咪 ?!
沙士情境, 大家又記得多少?
C : 咁耐以嚟香港政府算唔算支持香港嘅電影業 ?
小豪 : 你無睇今年香港電影金像獎咩 ? 頒新晉導演獎時, 林家棟都特別大聲講, 電影發展局呀 ! 都鼓勵呢個導演攞到獎, 獎勵佢十萬蚊呀 ! 多謝呀 ! 十萬蚊 ! 十萬蚊拍部微電影都唔夠 !
C : (我又大笑中) 同埋最抵死香港本土同政府申請街拍戲呢, 係好難批 !
小豪 : 係呀 ! 但你睇拍Transformers, 封咗中環比你拍都重得 !
C : 香港政府係對外同對內係好唔同!!!
小豪 : 係
C : 泰國優惠好好la, 你同佢申請大多都批, 所以點解彭氏兄弟咁鍾意係泰國拍戲呢 ?! 人哋泰國政府幫你封埋街 !
小豪 : 香港政府講咩呀! 支咩持呀 !
C : 政府係講一套做一套 !
小豪 : 表面嘢未做下囉, 話支持新晉導演個十萬蚊, 十萬蚊比你去拍戲! 你可以拍乜 ?
C : 夠你買部靚d嘅Cam拍(我同小豪都笑了)
C : 中港合拍片都20多年, 現在每年都係度增加, 事實上而家好多演員同導演, 都成為內地嘅打工仔, 心態上你哋轉變係點架 ?
小豪 : 心態上就要適應, 不過香港人勝在適應能力強 !
C : 咁同內地演員相處呢 ?
小豪 : 雖然人哋以前就好鍾意你香港電影, 但當你離開咗香港呢個地方, 去到人哋地頭, 就人哋嘅地方, 你要適應架, 唔係話佢哋唔好, 始終每個地方都有排它性嘅行為出現, 我哋香港都會, 好似我哋去台灣韓國拍嘢, 佢哋都會有面色,所以就睇你適應能力強唔強, 香港人適應能力係好快, 所以無問題, 我哋去到最緊要做好自己, 交番專業態度就可以 !
C : 拍攝手法同香港有幾大差別 ?
小豪 : 拍攝手法呀, 其實講真, 手法上好多都係模仿香港80年代, 甚至有d導演拍完, 話唔係模仿, 係自己創出嚟都得嘅, 但你一睇碟就知, 不過唔緊要, 拍戲其實都係大家拍理念嘅嘢, 講開以前我哋港產片都模仿荷里活架, 唔通我哋香港自己發明吊”威也”咩 !
C : 我重以為吊”威也”係我哋香港獨家!
小豪 : 係我哋香港用到街知巷聞就真, d鬼佬吊”威也”就直上直落嘅, 係我哋香港有d小聰明, 大智慧就冇la, 小聰明到可以將吊”威也”蕩來蕩去, 出神入化 ! 三樓跳落嚟用紙皮箱都係抄荷里活架, 見佢哋咁樣又跳到又安全, 我哋咪跟囉, 我哋都學外國架, 所以後過我哋嘅國內電影學番我哋係正常 !
C : 今屆電影金像獎提名電影大多都係合拍片, 得獎最佳電影<黃金時代>亦係合拍片, 其實作為合拍片, 究竟有幾代表到香港電影 ?
小豪 : 呢個唔知 !
C : 上年最佳電影<一代宗師>都係合拍片 ! 其實合拍片係咪已經代表咗香港, 同取代咗香港電影 ? (繼續追問嘅語氣)
小豪 : 合拍片始終取代唔到香港題材, 咁又唔好咁灰, 但事實係咁(哈哈), 其實你認真就輸咗, 其實香港電影金像獎, 可能係為咗其他香港導演可以上國內發展舖路, 即係一個香港導演上咗國內拍合拍片, 跟住係香港電影金像獎度得獎, 咁d國內觀眾見到得獎會好開心, 咁咪變咗香港電影d從業員可以多條出路! 返上國內發展下, 所以記住”認真便輸了”.
C : 我見到而家好多香港導演已經偏向拍合拍片 !
小豪 : 唔好話香港d大導演唔好, 咁每個人都係自私嘅, 當佢哋捱咗咁多年, 難得係國內可以叫價一億, 二億嚟拍部戲, 跟住又有幾十億票房, 咁人一定向嗰邊行, 唔會再返香港拍嘛! 係咪先!
C : 呢個好明顯要同老闆交代有幾多票房, 即係等於王晶話唔再拍港產片咁 !
小豪 : 成龍都講只有中國電影沒有港產片la !
C : 你對成龍呢個講法有乜感受 ?
小豪 : 哈哈 ! 其實講得唔夠客觀, 應該係只有地球電影沒有港產片, 根本就冇中國電影, 冇荷里活電影, 冇韓國電影, 因為只有地球呢個地方先有電影 !
C : 講得好 ! 去到最後一條問題 : 香港電影人出名生命力旺盛, 面對三十多年來環境不斷嘅轉變, 來到今日呢一刻, 你會為香港電影精神下一個什麼嘅定義？
小豪 : 香港電影係得嘅, 其實香港電影只係缺乏資金, 因為香港電影精神就係夠創新,題材其實我哋香港有好多, 香港電影精神係仍然有火, 好似我大半年前同好多新導演合作拍微電影, 其中一套重係意大利攞最佳電影獎, 個戲名叫<安居>講香港住屋問題, 佢哋係拍得好有火, 希望香港有多d新導演, 因為香港就係要有多d新思維, 先可以繼續拍落去!
全文完 !
特別收錄 ~ Collection 訪問後感 :
再次感謝錢小豪先生, 用咗寶貴嘅時間, 接受我一個外行人訪問, 自己既非專業, 亦不是記者, 純以一個香港電影愛好者身份出發, 由計畫到實行完成, 用咗八個多月時間, 單單每篇下期預告的文字, 就想了個多星期才下筆, 總想給大家睇完下期預告後, 有想追看嘅感覺,不知道有否成功 ! (一笑)
用二百多日做一個post, 對大家來說未必是一件大事, 但對於自己, 就係每個心情起伏不定嘅晚上默默完成, 所以到而家呢一刻, 感覺仍然係好興奮, 好不可思議 !
自少就走進不同戲院, 觀賞二輪新片, 工餘場等, 因為價錢平, 每日午餐食少d, 一星期左右就可儲夠15元入場, 走進戲院有冷氣固然開心(因兒時家裡冇冷氣) 偌大放映廳, 可令人暫離現實, 專注大銀幕 !
至今, 每次電影開場前, 自己心情仍會興奮莫名, 也不記得這許多許多,也不知受過多少的電影感動, 也有激動……
散場後, 總會受劇情感染, 說要做什麼, 定下什麼人生目標, 但人係惰性, 每每實行不到幾日, 就會有太多藉口比自己放棄!
但…誰都不知道”明天”同”意外”哪個會先來, 人生嘅時間, 大家也無法預知長短, 既然上天咁眷顧我們, 讓大家可以好好感受活在當下嘅一分一秒, 所以唔好浪費, 生活係好有趣味, 樂趣無窮嘅 !
正如我感受香港電影嗰份永不放棄嘅態度, 業界內仍有班熱愛香港電影嘅工作者默默耕耘, 我就想為”它”出點力, 人生最遙遠就是剛過的一秒, 所有過去都是我們回不去的曾經 !
電影是把夢想拍出來, 所以我愛電影, 自己夢想就係做一篇關於電影訪問, 我就把夢想寫出來, 呢個就係我寫這篇訪問嘅原因 !
如果剛過去的你錯過夢想, 下一秒的你怎麼還可再錯……….
希望睇過呢個post的, 就似香港電影般生命力強, 永不言敗, 去實現自己的夢想 !
因 – 這就是我們的香港電影, 這就是我們!!!
再次感謝每位支持過的你!!!
Collection字
********************************************************************************
如果大家都希望可以在討論區同 Collection 一起討論電影經, 可以去以下討論帖呢.
Collection 信箱 “香港電影的輝煌” ~ 錢小豪專訪(序言)
Collection 信箱 “香港電影的輝煌” ~ 錢小豪專訪(上篇)
