Master & Dynamic呢個品牌上年小瑟去美國探親時, 係D型仔電器店都有見過呢隻耳機, 仲帶埋上頭試聽, 不過老實講, 係街試耳機聽歌真係走馬看花, 你話好專心就呃人既, 不過當日真係一心試聽, 仲係用 iPhone 來做訊源, 感覺其實幾唔錯, 不過諗住係美國買返來又冇保, 就即時放低走人啦! 點知過左年多之後的今天, 香港竟然有代理引入, 小瑟即時有機會真正聽真呢對咁有來頭的耳機, 今次試聽既係 Master & Dynamic 中的大哥 MH40.
Master & Dynamic來頭其實不少
講少少呢個品牌既來頭先, 呢個牌子來自美國既紐約, 創辦人係一名華爾街金融界財俊Jonathan Levin, 一直以來, 佢熱愛音樂, 又鐘意玩耳機, 不過就係市面上一直搵唔到一隻佢認為可以貴氣兼好聲並重既耳機, 所以最終就決定搵Bose同Apple既設計師幫手, 建立一個自己既名牌, 於是 Master & Dynamic 就係咁樣出現架勒. 亦因為 Jonathan 既品味出眾, M&D係美國已經深受年輕一代歡迎, 就連萬人迷碧咸出街時都機不離身, 認真唔講得少呀….. 小瑟當然唔敢好似咸爺帶出街啦, 因為……..我仲要迫地鐵, 好熱架麻~XDDDD
開箱圖文
好勒, 隻MH40成件藝術品咁, 唔慢慢同佢一件件除衫, 又點對得住大家呀, 大家睇野勒~XDDDD
∇一開盒睇內部, 隻MH40耳機擺得靚靚仔仔, 中間果個就係耳機線既盒, 一陣開埋比大家睇睇.
二條耳機線, 有咪又得, 冇咪都得.
耳機線分別都有二條, 一條係比手機用, 有咪又有得調校大細聲, 而另一條就係純耳機線, 其實小瑟早就覺得如果新耳機來講, 呢個配套最好, 始終有時都唔想多隻香爐影響音質, 始終有咪既線就等於好似多左個FILTER咁, 雖然大家都可能會話, “好心啦, 呢D耳機睇樣架姐, 邊有音質可言架”, 平時小瑟都有機會認同呢句說話的, 不過今次就有D例外, 呢隻 MH40 聽過雖然唔係Hi-End耳機, 不過以手機來推動黎講, 真係幾好聲, 平時小瑟試呢類”樣”行先既耳機都唔會囉Hi-Fi歌來試的, 不過呢次就囉左隻影音展LPCD來試試佢, 當然…..訊源都係用手機啦~~~~XD
∇MH40下面有二個耳機線插頭位, 不過條耳機線又只得一個頭炸喎, 究竟另一個插頭位係咩用既呢???? 大家睇落去就明架勒~^^”
45mm釹制大單元
MH40以全鋁制造, 上手有質感得來好實在, 但又唔係好重手, 只重360g, 以45mm大的釹質作為耳機單元, 好處係可以保存高效既分析力之餘, 低頻亦可以更有力有彈性, 而用到45mm都好少有, 所以mh40都算足料, 尤其你知道隻耳機其實只賣3k幾, 算係咁啦!!!
∇呢個耳機調校鬆緊既位置, 有刻度表示, 真係非常之咁復古呢!!!
∇頭帶以小羊皮作物料, 拿上手非常舒服, 就算係依家呢個熱到不得之了既夏天, 都唔會痴手痴腳呢.
∇ 又係以小羊皮作物料既耳綿, 舒適度唔錯, 小瑟真係試過依家呢個天口(33度…~_~)帶出街(一次咁多XD), 都唔會焗到有唔舒服既感覺, 不過我都只係帶左一陣(30分鐘左右), 之後就去左有泠氣既地方呢~XDDDDD
∇將耳綿拆左之後, 就會見到耳機真身, 好得意, 左右二邊都會有個鐵牌, 一邊就係品牌資料, 而另一邊就係耳機資料, 仲會刻左型號入去, 唔知遲下會唔會玩下特別版, 比用家打埋自己想要既字, 方便作紀念之用呢!?
∇之後就要同大家講下呢粒”制”勒, 好多人一見到就即時問, 呢粒係咩來?? 大家估唔估到呢粒野係咩來呢????……………..答案原來係 Mute(靜音) 制來, 一按下就冇聲, 再按就解除, 估唔到廠方會玩呢D, 都幾得意, 小瑟都好想知, 究竟廠方點解要專登整個 Mute 制比佢呢!??? 唔通 Jonathan 成日會比人打擾? XDDDD
∇睇完機身就睇埋個盒勒!!! 拿走個耳機固定綿先, 底下仲有野喎!
∇一個耳機袋, 另一個就係一個紙盒仔.
∇先睇下個耳機袋先, 用磁性貼封口, 方便開關!
∇袋左個耳機入去之後就係咁樣勒, 再放入自己出街個袋, 咁就一定唔怕整花耳機啦~~~
∇好勒, 睇埋個紙盒有咩先, 哦…原來係說明書一本~~
∇拿拿拿, 呢一頁就話比大家知, 另一個耳機線插位用來做咩勒, 大家睇完係咪即時明哂, 呢個耳機竟然可以比你同你既愛人一同SHARE聽緊既音樂, 呢個設計即時另到小瑟返返中學時代, 好那些年呀!!@@”
實試環節
講左咁耐, 講來講去都係耳聽為實啦, 小瑟以自己用緊既 Sony Z3直出聽 Kay 的《獨家村》, MH40夾Z3都要開到八格(最盡十格)左右就會出到平時聽開既音壓, 拿…..好多人問我電話聽歌其實得唔得? 老實講, Sony Z3聽歌出黎係會有一點點”燥”味的, 即係佢唔會出到好干淨既野, 不過如果係聽POP既話, 有少少音染雜質係可接受既, 而MH40係Z3既推動下, 《獨家村》一開頭的結他位竟然有一點點幼細感, 而 Kay 把聲厚度亦都岩岩好, 反而值得講下既就係佢係音樂同人聲兩方面既平衡做得幾好, 唔會過人聲太大冇左音樂感, 音樂感太多又冇左人聲咁, 以耳機聽歌來講, 尚算合格呢.
之後小瑟就拿來老婆的 iPhone6 來試下勒, 之後佢係 iTune 下載了 Let it Go 比亞女聽, 就囉呢首來試試, 大家都知道 iTune 買返來都係壓縮左既版本, 不過係MH40夾iPhone之下, 竟然係音樂背景中的”切切”聲都可以聽得到, 仲幾清脆添呢. 整體音樂聽感仲係有小小廣闊, 有DD音場感出到來, 就係因為咁, 小瑟就決定登入家中 NAS 囉埋隻 《2011原音精選》來試聽一下勒. 小瑟選左亞LAM的《每一個晚上》, 呢個版本如果有套唔錯既2 Channel 系統來聽的話, 絕對係可以享受到亞LAM頭段清唱位置, 亞LAM口形既形態同口水位, 係MH40夾iPhone上的確係做唔到小瑟聽開的效果, 不過佢已經可以營造到果份背景寧靜感同空間感, 當然亞LAM磁性既聲線份質感仲未係可以勾劃到出來, 不過以一隻唔係玩發燒友市場的耳機來講, MH40都可以話係力求忠實表達形耳機.
結語
試玩了MH40一個星期左右, 發覺佢造功可以用一絲不苟來形容, 每一個細節位置, 耳機中的每一個組件, 都會細心想想有什麼可以另件耳機更型, 更有味道, 呢點不是一般耳機廠商會第一時間考慮的地方, 小瑟相信D&M的設計概念係將品味與造功, 加埋忠於原音於一身為目標, 而MH40官方定價HKD$3498來講, 對於一眾對”樣”, “聲”, “品味”有一定要求的玩家來講, 價錢都算係射程範圍呢!!!
