小瑟一直玩耳機都好希望可以係未知價錢之前就聽一排先再估佢價錢, 大家見到個主題小瑟一開始就講 “估佢唔到原來咁平的” 第一反應會覺得 “有幾平呀???” 當然大家可能見到個價之後, 都只係會 “車…..都唔係平啦” 咁的反應, 冇錯, 如果只睇樣同價錢, 呢隻耳機一D都唔係以價錢來取悅大家的.
第一印象已真的不錯
講返件事先, 今次真係可以借左隻耳機返來, 玩左好耐(真係好耐, 成個月都有), 一直唔上網搵料, 一直都唔問代理咩價, 只係知佢包裝幾靚仔, 就放入耳聽, 係未有價錢知道之前, 小瑟放係Sony Z5P上聽, 一聽之下又真係OK 喎, 音樂的分離度做得好好, 同埋一開聲已經唔洗點煲已經有好好的細緻度, 就算只係手機推都出到高中低三頻出來, 真係幾好!!
如果 HS1004 身上掛上是名牌子?? 一定唔止呢個價
有時小瑟都會因為太多野做, 就算借左耳機返來都未必會有時間聽, 之後都會交比其他版主兄弟試下再同大家出報告分享, 有時自己都只係睇返大家的報告去了解該耳機的聽感. 老實說, Acoustune 呢個牌子上次的 HS1003 小瑟聽過一陣, 唔係好岩我聽, 低頻有D過左火, 同埋高低二頻唔係好平均, 好似高音位要煲好耐先可以修返圓, 所以一直都好小再聽. 但今次 HS1004, 其實一開始聽時試左手機, 感覺幾好, 再試埋 AR-M20, Sony ZX2, Cayin i5, 手機+OPPO HA-2耳擴, 聽完真係唔係幾好意思唔出篇文同大家分享一下, 而小瑟到今日臨寫文前, 先岩岩上網睇睇佢究竟係咩價錢, 原來只係 HKD$1780, 真係即時 @_@ 咀, 因為小瑟聽左成個月, 由開聲第一下的感覺, 到睇到價錢之前的一刻, 小瑟都估佢最平應該都係三千幾, 如果呢個牌子係其他大品牌, 索價七至八千元一D都唔出奇, 但上網睇到 HS1004 的身價, 真係估唔到原來只係HKD$1780, 即係好想同代理講不如唔洗收返, 留返比我升啦..^^”……..但呢件始終係 Sample, 如果買隻 Sample 咪好ON車……XDDDDD
分享一下聽感
同大家分享一下以 HS1004 來聽流行曲, 小瑟聽左 A-LIN 的《難得孤寂》A-LIN 的歌聲磁性強, 尾音靚就係人都知, HS1004 可以將佢把聲同音樂的分隔做得好仔細, 另人不期然的會越開越大聲去聽, 但 HS1004 最正的就係你開幾大聲都好, 佢都 KEEP 到穩定的音質, 有一次小瑟唔小心一開機時, 原來 VOLUME 已經開到好大, 一開聲差D聾果隻, 即時蚊耳機都蚊唔切, 但就係果幾下低頻同爆發力, 小瑟聽到 HS1004 係竟然可以 KEEP 到實淨的低頻, 唔知仲以為聽緊大耳牛呢…XDDDDD
聽《傻豹》及《Beyond – 真的見證》 時……
HS1004 除左聽女聲 OK 之外, 小瑟近日玩 RIP SACD, 開始囉家中的 SACD 來 RIP 下, 所以手上有最新鮮的傻豹 DSD FILE, 如果有聽過第一首《Pantera Roas Hamilton Birro Kramer》既朋友都知, 佢色士風的效果如果係家中大機出喇叭的話, 係有個好鬼正的距離感的, 所以自己就最鐘意呢首音樂的”離箱感”, 用 HS1004 聽時, 果下離箱感就另小瑟不期然的要除下耳機出來聽下其實係咪出面有聲, 呢種不經意的效果, 相信有不少耳機友在聽耳機時是最過引不過的. 另外 HS1004 對應付快歌同勁拍子的歌都好有一手, 小瑟試聽歌又點可以小得聽 Beyond 的歌呢, 所以就找來 1989 年Beyond 《真的見證》大碟中, 第5首《勇闖新世界》, 最尾咪有一段SOLO打鼓既, 隻耳機不停咁回彈回彈果個感覺真係好好FEEL呢!!!
Conclusion : 「聽得耐我都真係怕會聾呀!!!!!」
聽左HS1004咁耐, 小瑟會以平衡度高, 又好捱得來形容 HS1004 , 一來小瑟聽歌真係好雜食, 咩歌都會聽, 英文歌, ROCK歌, 慢歌, 廣東歌, 事關聽歌既野, 錄音好聲固然開心啦, 但主要都係聽 “歌” 本身岩唔岩自己聽先, 唔岩聽的更好聲都係假. 咁岩HS1004 又係雜食類, 小瑟仲成日聽聽下不期然越聽越大聲, 真係怕有一天會聽到耳聾而不自覺呢……XD!! 另外如果大家真係有興趣呢對耳機, 小瑟有一個建議, 你入手時不妨入埋對SpinFit CP100的耳膠, 因為 HS1004 自家跟來的耳膠雖然都好幾種, 仲有二隻好似 SpinFit 的, 但因為 CP100 的管道衝程比較長一點, 呢個對於低頻的申延可以做得更好, 所以呢個絕對係要一併入手的. 講返個耳機, 小瑟都要真係認真地考慮一下會唔會入手一對, 一來係依家小瑟手上入耳式耳機真係唔多, 而近日都不自覺地囉左 HS1004 來使用, 怕冇左都會有一點唔習慣, 二來小瑟對呢隻耳機的品牌都有一點點的期望, 到現在呢刻都依然覺得 HS1004 的身價應該仲有上漲的空間, 如果他日有新型號推出時, 可能就未必會係呢D價位可以入手的了!!!
∇ (左圖) HS1004 跟機來的耳膠…..好可惜, 冇隻岩呢. / ∇ (右圖) 左邊的是SpinFit耳膠, 右邊的是HS1004 跟來似 SpinFit 的耳膠, 細看好似一樣, 但睇管道長短就知有分別.
∇ Sony Z5P + OPPO HA-2耳擴解碼 + HS1004配搭.
∇ Cayin i5 + HS1004
∇ Sony ZX-2 + HS1004
