五月份《神劍亞瑟王》同 《異形 : 聖約》揀左係同一日上畫，Hugo 最終因此場次同時間唔夾而揀左睇《異形》，同「亞瑟王」緣慳一面。知道《神劍亞瑟王》原來已出左 4K 碟仲要有齊 Dolby Atmos 同港式風格繁中字幕，二話不說即刻入貨，俾面睇下「Guy」導 (Guy Ritchie 佳列治) 首次拍古裝史詩可以去到邊。 其實 Hugo 由《神探福爾摩斯》(2009) 先留意到「Guy」導既作品，亦非常中意佢將傳奇 (虛構) 人物「型棍化」。Hugo 坦言《神劍亞瑟王》既突破感同當年《神探福爾摩斯》事實爭一大截，少左 Guy Ritchie 個種玩味同放任 (英式幽默 + 無厘頭)，但單論動作元素及華麗既正邪「過招」畫面，此片依然做足。加上有 Dolby Atmos 加持，點講都係近期最值得推介既有 4K 碟之一 。
∇ 此片是 Guy Ritchie 繼《特務型戰》後另一套搭載 Dolby Atmos 聲軌的藍光影碟，無論 4K 或是一般 BD 版都配有 Dolby Atmos 音效，但 4K 版的音效在動態、細節方面就略勝 BD 版一籌。由於之前 《特務型戰》的 Dolby Atmos 聲效相當好聲，所以 Hugo 在未拆封此碟前已對其效果頗有期望。
∇ 花絮部分大約一個小時，內容主要圍繞班底翻拍民間故事「亞瑟王」的緣起以及多項關注落手製作的秘辛如選角、服飾、佈景等。
∇ 畫質方面，此片的色調偏藍，幾乎所有室外景色都曾現一種冰冷的深藍色，憑畫面已可感受到此片在拍攝時正值英國嚴冬與春天之間，即使蘇格蘭的郊外景色都見不到有茂密樹林風光。至於 4K HDR 在冬日、昏暗的場景下亦有所加持，演員面色、輪廓以及服飾質材、線條在高反差下仍有十分富立體感的表現。
∇ 此片在 Dolby Atmos 的輔助下都有十分埋身的電影感表現，例如片首巨象在鏡頭以外步逼近，巫師作法時的低頻都極有逼力，所營造的氣氛和戲劇效果都十分有臨場感。
∇ 亞瑟每次出超必都會引發一股低頻，片中約 70 分鐘處一段追逐戲除了可試出天花喇叭的空間定位距離外 (敵方放訊號箭一幕)，亞瑟出招時的動態 + 低頻加飛砂走石的效果也相當鋪天蓋底，打開機的朋友應該都會對這種屈機畫面深感過癮。
∇ 亞瑟學師過程中竟然有斬獸既情節，唔通電影公司想將《哈比人》個元素同亞瑟王做 Crossover ???
Conclusion : 「格鬥場面華麗 Dolby Atmos 為大型動作戲加持」
《神劍亞瑟王》在故事上雖然是驚喜欠奉，但聲畫效果亦算不俗。而且片中的不少打鬥場景都算有心思，特別是亞瑟放超必時的畫面都極為華麗，在 Dolby Atmos 配合下相當震撼埋身。跳出「亞瑟王」大名的擔子來看，未嘗不是一套有睇頭的古裝動作片。
