昨天係手機品牌 LG V30 的香港區發佈大日子, 一直都用緊 LG G6作為日常使用的手機, G6 既表演亦都交足功課. 而一直以來 LG 的 V 系列就更加係 G 系的大阿哥, 無論係屏幕尺寸, 影相拍片上, 都有非常優良既效果, 但要講到 V 系最起朵的, 就當然一係要數其靚聲 DAC 的功能啦, 今次 V30+ 究竟可唔可以保持到靚聲 DAP 手機的美譽呢???
32-bit 靚聲 DAC 再度加持 更附加支援 MQA 功能
一直 LG V 系列優質靚聲，V30+ 繼續備有 32-bit Hi-Fi Quad DAC， 更支援 MQA 技術，讓一眾音樂愛好者能享受 Hi-Res 高清音樂的同時，又可以減少下載大檔案的煩惱。另外 V30+ 亦都有音響品牌 B&O PLAY調音，對於音色有一定的保證。而今次手機的 DAC 內更加入了 Digital Filter（數碼濾波器）及 Sound Preset（音效預設）兩個新元素。內置三組 Digital Filter 有三種不同的模式，情況就類似 AV擴音機中的三個 Filter 功能，有＂Short＂、＂Sharp＂、＂Slow＂三個選擇，大家可以讓自己不同的耳機去測試一下邊一個比較適，非常好玩。
首部 OLED 18:9 HDR10 屏幕 黑位再度提升
V30+ 是 LG 首部配備 18:9 OLED FullVision 屏幕的手機，為用家呈獻更完美純黑、對比度更高和準確的細緻色彩，用來睇戲絕對一流。而其 7.3mm 纖薄機身內就已經可配備 6吋大的屏幕，毫不影響機身手感，重量更只有158g，是現時6吋屏幕手機中最輕之一。
跌極都唔壞？？內存 128GB 特大容量 夠哂你影 4K 或聽 Hi-Res 歌啦！
LG V30+ 使用 Qualcomm® Snapdragon™ 835，備有4GB RAM/128GB ROM特大容量。除此之外，V30+亦通過14個類別的 MIL-STD 810G 摔落測試，符合美國國防部的軍用標準，可能大家會話呢個有咩用呀?? 但以小瑟用過半年 G6 的親身體驗，呢個軍用級的摔落測試，的確係可以非常有用，事關小瑟成日跌手機，係無任何保護的情況下，成日跌手機既我，部手機都未試過因跌落地而有任何功能上的問題，屏幕更加冇試過”爆Mon” 情況出現，對於大意的你一定非常岩用。（但當然機身就一定會整花啦ＸＤ），除左防跌，更有 IP68 防水防塵功能，亦可在水深 1.5 米的環境運行達30分鐘。其無線充電功能及 Quick Charge 3.0，可在30分鐘內由0%充電至50%，岩哂心急的你呀。
Cina Video 拍片 Point Zoom 係咩??? 我叫佢做定點 ZOOM!!!
大家使用手機時其中最常做就一定會有睇片同拍片呢二個功能啦，所以今次 LG V30+ 在拍片的模式中加入自家 ” Cine Video模式 “，功能包括 Point Zoom 定點縮放 及 Cine Effect 電影濾鏡效果，大家可以借助內置的拍片功能去將你的影片更有電影感，拍條片都型過人呢。而 Cine Video 備有 15 種預設 Cine Effect 電影濾鏡效果模式，除了提升影片質素，亦為用家提供玩味十足的拍攝體驗。以往的變焦技術只局限在屏幕正中央，全新的 Point Zoom 定點縮放功能讓大家可以點選畫面上任何一個位置進行變焦拍攝，令影片拍攝更具電影感。
CONCLUDSION：「要保持 V 系靚聲 DAP 手機美譽絕對不是問題 !!」
小瑟昨天一直都將 V30 來個反覆的試聽，當中有用到男聲既有學友，家駒，女聲就有宇多田光，流行曲，靜態歌曲，動感歌曲都有，而當中小瑟亦有跟 V30+ 會跟機送 B&O Play 耳機，Onkyo E900M，Campfire 綠仙女，而當中小瑟最有驚喜的可以話係佢原裝的 B&O Play 耳機，雖然只係跟機耳機，但以聽男聲的唱歌位的質感，音樂感都有唔錯的表現，唯獨立體感相對比較低一點，但跟機喎，送炸喎，以這個角度去睇就絕對聽得過有餘。而另外二款耳機在 V30+ 上都有唔錯的表現，以一部手機自家去推呢二隻耳機已經叫有板有眼了，尤其在 V30+ 配上仙女座時，背景的寧靜度令小瑟都非常滿意。如果大家都想知更多小瑟對 V30+ 在聽歌時的評價，可睇我地足本評測片啦！！
售價與推出日期
LG V30+ 智能手機備有極光黑、天際銀、摩洛哥藍及薰衣草紫四種優雅色調以供選擇，現已於各大特約網絡供應商及零售商接受預訂，並於11月中旬公開發售，建議零售價為港幣$5,998。除了隨機附送 B&O PLAY耳機外，客戶更可續享LG V30+額外一年本地保養。
主要手機規格
♦ 顯示屏 : 6.0″ (1,440 x 2,880) QHD+ OLED FullVision®
♦ 處理器 : 2.45GHz Qualcomm® Snapdragon™ 835
♦ 作業平台 : Android 7.1.2 (Nougat)
♦ 記憶體 : 4GB RAM / 128GB ROM (支援 Micro SD 記憶卡高達2TB)
♦ 後置鏡頭：1600 萬像素 , f/1.6大光圈 , 71°標準鏡 , 光學防手震 OIS 2.0
♦ 廣角後置鏡頭：1300 萬像素 , f/1.9大光圈 , 120°超廣角鏡
♦ 前置鏡頭：500 萬像素 , f/2.2大光圈 , 90°自拍廣角鏡及可轉換至 80°標準鏡
♦ 電池 : 3,300 mAh 高效鋰電池
♦ 顏色 : 極光黑、天際銀、摩洛哥藍、薰衣草紫
♦ 體積 : 151.7 x 75.4 x 7.3 mm
♦ 重量 : 158 g
♦ 其他功能 : 防水防塵 (IP68), Qualcomm Quick Charge 3.0™, MIL-STD 810G 摔落測試、32-bit Hi-Fi Quad DAC、指紋感應器、人臉及聲紋辨識解鎖功能、無線充電
♦ 建議零售價 : $5,998
