2018年我地有好多新嘗試發生了, 而且有好多新挑戰多得大家的支持, 我們都一一順利完成了. 踏入2019年第一個PO, 我地首先祝願大家『新年進步，身體健康，月月換新機，年年換大屋！^^”』。去到２０１９年，我們都有好多不同的想法希望可以在未來一年可以讓大家可以玩得更多開心。迎接2019之後, 不如我地又來回顧一下我地2018年發生的一件件難忘事先啦!
第一次遠征日本參與唱片製作 – Fever Vincy 泳兒發燒音樂之旅
我地係2018年一月, 就聯同英皇唱片, 為 Vincy 的全新發燒碟來一個【Post76 獨家呈獻 – Fever Vincy 泳兒發燒音樂之旅】, 呢個特輯我地一連跟足 Vincy 的製作團隊去日本直擊呢張發燒唱片的制作, 最正當然係可以進入日本神級錄音室 ONKIO HAUS 啦, 當年音樂大師『板本龍一』都係度錄製《Merry Christmas Mr Lawrence》。對我地來講絕對極具意義呢!
成為首屆《個人音響文化節 PAF 2018》協辦單位
2018 年我們 Post76 再次嘗試新玩法, 今次就聯同積極推動本地耳機文化的 Lyra Media 在 2018 年 3 月份, 協辦第一屆《個人音響文化節 PAF 2018》。 希望讓我們香港這個彈丸之地, 都可以擁有一個屬於香港人的耳機文化展覽活動。
同外國影音專家Peter上了重要的一課
小瑟好開心2018年可以有機會同到國際影音專家 Peter Aylett 一談未來影音的科技, Peter 係美國 CEDIA 技術委員會主席(CEDIA’s Technology Council Chairmen), 雖然佢身份地位非常高強, 但同小瑟傾計一D架子都冇, 而且亦都係因為呢次的會面, 佢仲應承左2018年會一連三日出席我地DES2018的活動, 同大家分享影音事, 呢件事對小瑟來講, 非常深刻。
英倫影音朝聖之旅 – 第一次同大家飛出香港睇影音
『英國』一直與影音文化劃上等號，如電影「James Bond」、音樂「 The Beatles」等名字都係大家的集體回憶, 六月我地就有機會可以一行四人一同踏足這個咁有影音歷史的地方，一連五集的《英倫影音朝聖之旅》, 就讓小瑟大開眼界, 而且對英國呢個地方加添不小好感呢……!!!!!
全力支持2018 HKUA 盃校際《小結他音樂節》
一直都覺得音樂可以影響小朋友的發展心智, 讓佢地對任何事物都會更有耐心, 同愛心, 所以今年我地 Post76 全力支持小結他學會的音樂節, 希望可以盡一點綿力去推動小結他學會讓更多人可以知道佢地每年都會有呢個咁有意義的比賽, 從而可以加多人受惠. 而今年比賽事後小結他學會更加得到 Cambridge Audio 音樂基金的支援, 在學會日常的課程或表演上都可以讓有需要的小朋友用優惠價錢開始試學小結他, 呢點係讓我們覺得非常之有意義, 期望以後小結他音樂節都可以讓一年之中努力練習的小朋友一展身手, 在台上盡情發揮呢!!
自家製作音樂會 RubberBand x 林二汶 Xperia 極!玩樂派對
今年我地有機會可以有幸可以得到 Sony Mobile的信任, 全力製作一場『RubberBand x 林二汶 Xperia 極！玩樂派對』音樂會, 今次雖然唔係我地第一次製作的音樂會, 不過今次好特別地就係小瑟都冇在台前參與, 全力負責幕後的工作, 可以見到全部 Post76 的同事們全心協力地做好整個演唱會, 對小瑟來講係一件非常過引的事呢, 值得紀錄呢!!!
第一次製作的10″黑膠唱片
當知道，我們終於可以舉辦一個屬於自己的影音玩樂展，小瑟第一時間想起的是製作一份紀念品，我們希望可以做出一張大家一定會記得，而且讓一眾一直支持我們 Post76 的多年版友們，都可以有一個真真正正的實體紀念品，所以我們大膽地選擇了推出一張 10” 的黑膠唱片，成為這次『Hong Kong Digital Entertainment Show 2018 – 香港影音玩樂展 2018』的紀念大碟。
最重要的當然是……….香港影音玩樂展2018
攪左 Post76已經第16年了…..係好多年前, 成日都去八月的影音展, 都會諗, 有冇一天我們可以舉辦一個我們自家的影音展, 今年2018年, 我地終於都可以圓夢, 第一屆已經過左一個月, 小瑟仲係覺得好似未開始咁, 好多野都好似發左場夢咁. 固中辛酸, 我諗有辦過展覽會的老友們都一定會明白. 會後我地都不停的反省, 不停的檢討. 雖然好多朋友都話 : 小瑟, 轉場啦, 九展真係唔夠方便呢…..但其實香港仲有咩地方可以攪到展覽會呢?? 有房, 有高樓底而又可以有呢個面積比大家慢慢行, 睇下平時自己心頭好的真係唔多. 所以我地2019年舉辦 DES2019的地方都會係『九龍灣展貿中心』, 不過今次我地除左三樓 StartHall 之外, 我地在六樓會租哂全部八間房做我地DES2019的影音示範房, 希望今次可以帶更多, 更好的體感比支持我們的您!!
16週年版聚…..回歸平實的忠實版友聚會
因為同事們籌辦 DES2018 已經消耗太多, 所以今次我地16週年的台慶都希望可以簡單地同一班忠實的版友們食個飯, 大家開心傾傾計, 交流下咁. 好開心今年由一眾16年前一直到現在的”三潮元老”, 加一眾玩老級支持我地 Post76 到今天的版友們到場, 雖然今年冇華麗的場地, 冇豐富的禮品, 但大家不停隊啤, 分享玩機心得, 當年信和買碟的經過, 真係好開心好開心咁玩左一晚. 在此小瑟再一次多謝支持的版友, 有您地每天到來, 我們先可以撐到今天…..多謝您地!!!
黎緊2019年, 環球經濟氣氛雖然真係唔多好, 大氣氛變化不定. 不過小瑟好希望我們一眾的版友都可以維持住一份玩樂的心, 小瑟到依家都係咁講既, 做人日日返工咁辛苦為乜?? 返到屋企呢個最舒服的地方, 一定要搵D野比自己玩, 聽歌, 睇戲永遠都係可以幫助大家減減壓, 抖抖氣的一個最好方法, 希望大家都可以係我地 Post76玩樂網 呢個小小的討論區, 找到志同道合的老友, 一同分享你的喜愛, 你的心水. 講野唔岩自己聽的版友, 咪當睇佢唔到, 聽佢唔到囉, 上得來最緊要係……….『開開心心啦!!!』🤩😎
