之前小瑟都有幸可以係上年 Justear 岩岩出時, 一次過借哂三隻返公司慢慢聽真D再同大家分享, 如果大家都有興趣了解可以《點我重溫》
. 今日小瑟又有機會可以一試二隻新調音的 WM1 同 LiSA 版本. 究竟點解 Sony 做咩無啦啦係佢地既 CM 系列又攪多二款出來呢???
Sony 的 Justear 究竟有幾多個版本呢?
先又講下上年 Sony 在香港正式加入客製化 CM（Custom Made）耳機的戰線, 首批推出的耳機有三款不同的聲音風格, 包括忠實還原的「Monitor」，適合多種音樂使用的「Listening」及低音加強的「Club Sound」。而單元部分，則採用 1 個動鐵單元，負責中、高頻段。另再配合特大的 13.5mm 動圈單元，以加強中低頻的厚實聽感。而早在 Justear 出左之後, 今年之後再有一隻叫 Justear MH1 既東西, 呢隻就係連音質都爲你訂造，真真正正世上獨一無二的CM。我都係係我地版上的師兄有個超正的文先知的《[超長開箱文]CM玩到封頂係點樣？就係咁樣! – Just Ear XJE》係度真係要多謝 nanaholic 一下先. 
今次呢二隻 WM1 同 LiSA 又係咩由來呢?? 話說 Justear 的計劃主開發者『松尾伴大先生』之前在調音時都唔係用黑磚或金磚去做調音工作的, 而今次 WM1 版本就係用上 Sony 呢兩部傳奇 DAP 去做調音勒, 所以可以話係完美咁配合左黑磚同金磚既特性去調音的. 小瑟都有部黑磚入左手, 即時性趣大增啦~
LiSA版本的由來
而 LiSA版本又係咩呢??? 我諗好多ACG動漫迷對 LiSA 呢位唱動漫歌曲的日本歌姬一點都唔會陌生, 而呢隻 LiSA 版本就係 Justear 專登就 LiSA小姐最喜歡的音質來調出最岩佢口味而推出的一隻耳機, 依家 LiSA小姐日常都係用呢隻耳機去演出的, 如果你係 LiSA 的歌迷, 知道可以用埋同自己偶像同一款, 什至係同一隻聲音的耳機, 呢個真係非常非常非常之正斗既事呢~呵呵
!!!!!! 好可惜小瑟偶像係家驅同哥哥張國榮啦………. 言歸正傳, 呢二隻耳機小瑟就聽左一個星期左右，依家同大家分享一下聽感, 如果大家之後都有聽過的都可以同我分享下呀~
Sony 金磚 + Justear WM1
WM1 嘅調音取向偏向於分析力強, 定位清晰的一類, 屬於聽管弦樂, 日本動漫歌曲, 都係非常理想嘅配搭, 係調音上你會聽得到樂器既擺位空間之中的層次, 效果係非常明顯的. 唯獨喺低音嘅表現上面, 如果以聽流行曲, 或者低音比較多嘅音樂, 例如 KPOP等 電子音樂調子比較重的, 或者係 Disco音樂, 感覺上就有一點到喉唔到肺的感覺, 所以小瑟相信 WM1 的調音風格係以分析力及音場廣闊為目標的, 尤其小瑟在測試期間, 試過聽 Lady Gaga 的電影『星夢情深』OST 中的 《Shallow》等等幾首歌, 雖然此碟片中的 Gaga 在人聲的厚度非常不錯的, 而係 WM1 的演繹下, 人聲的厚度相對比較輕柔, 但Gaga 後而的樂器定位, 就反而從未有過如此這般的清晰, 明亮, 背景之深亦都係非常難忘!!!
Sony 金磚 + Justear LiSA
小瑟喺未聽過 LiSA 版本之前, 直覺上會覺得 LiSA版本的調音取向, 或者都會係以高音為主的, 因為動漫的歌曲一般都通常比較刺激感重, 正常應該都會是加強高音的重要性為方向吧. 但試聽過之後, 小瑟的直覺原來係徹底錯誤呀……..@@” LiSA版本的調音原來反而著重中低頻的表現, 聽落有一點點溫暖的感覺, 而且音樂感相對比較厚身, 而人聲的厚潤度仲深得小瑟心, 就以聽『宇多田光』的新曲《Play A Love Song》為例, 本身這首歌的 Dynamic 都不是這麼強勁的, 但在 LiSA版本的加持下, 音樂感, 跳躍感, 就有著明顯的提升, 令到整首歌的氣氛都出現跳脫的感覺, 非常有驚喜呢!!!~
Conclusion：「兩隻新版其實各有特色…….只知人係貪心的呢!!!!」
試完這兩個 Justear 的最新版本, 小瑟個人口味比較偏向鍾意 LiSA版本的調音多一點點, 事關小瑟聽歌的口味都屬於雜食類, 流行曲的比重反而會比較多, 所以在呢個情況之下, LiSA版本相對比較適合小瑟日常使用, 但又咁講, WM1 的細節及分析力, 亦係另人一聽難忘, 小瑟當然明白針冇兩頭利, 但人總是貪心的. 雖然小瑟成日都用金磚試耳機, 但亦都係因為呢一雙 Justear 的關係, 聽得太多, 聽到入哂骨, 而且小瑟近日又見黑磚價勁吸引, 所以最終都係……………………敗了!!!! 之後下一步係咩呢??? 用咩來配上4.4頭去玩平衡呢????? 呵呵, 呢一刻我都未知呢~
Sony Justear 耳機規格重點
◆ 類型: 封閉式, 混合型
◆ 驅動單元: 一枚13.5毫米動圈驅動單元 (低音單元) , 一枚動鐵式驅動單元 (中/高音)
◆ 最大輸入: 100mW (IEC*)
◆ 耳機纜線: 約1.2米無氧銅姣合線 (可卸換式, Y型)
◆ 插頭: 鍍金L型立體迷你插頭
♦ 售價：HKD $19,888
