唔覺唔覺, 原來今年已經係第二年做唔到台慶版聚了, 越來越覺得下年, 什至係唔知幾多年先再有機會可以攪到版聚. 回想起2018年, 我地攪DES2018, 本來時間係想夾到台慶日發生, 但場地既野, 又邊到我地話事丫, 所以只可以係最近的 11月尾舉行. 不過都好, 12月2日我地都仲可以攪下版聚食飯, 所以係2018年, 我地就攪左個”Post76玩樂網 ~ 十六周年台慶版聚”, 最終都有30位版友出席. 點知呢一聚之後, 估唔到2019年, 2020年, 去到今年2021年, 我地都唔可以再攪任何聚會, 什至連平日做開的活動都冇得攪了.
而且今年亦都不少多年支持76的忠實版友都相繼移民英國, 或其他地方, 要再有機會重聚機會都真係比較難了. 不過唔緊要, 依家世界已經唔同左, 有左 Internet 之後, 其實大家要見面, 要交流, 要分享, 要討論已經再唔係一件難事, 而且大家都係相識於科林, 相識於 Post76 玩樂網呢個地方, 有D版友有時比我地既親戚朋友聯絡得仲要多. 所以我地 Post76 討論區點都會一直保留住, 讓大家都可以有一個可以互毒同互相幫助的小社群. 而且小瑟亦會同Post76的編輯部手足, 版主們一同緊守著這個「香港人要玩就要玩有質素的”影音玩樂資訊社交平台”」這個小小的角色, 希望可以讓一眾需要休息, 需要放鬆的香港人可以更容易同集中地找到岩自己玩的小玩具, 同玩好自己入手左的小玩具. 就係我地 Post76 需要負起的使命.
2022年就會係我地20週年的台慶, 雖然唔知明天會點, 但大家永遠都要對明天抱有希望, 如果唔係就會 “同條咸魚有咩分別呀??” 對嗎???
祝大家事事順利, 身體健康!
小瑟
2021年12月02日
