小瑟一直都用緊好幾隻不同耳機, 有 D 係日常比手機用, 有 D 係屋企用, 有 D 出街配 DAP 用, 近日見身邊好多朋友都紛紛換上近年在耳機界火速冒起的 Campfire Audio, 上網細看之下, 發覺原來 Campfire 原來是著名線材品牌 ALO Audio 旗下耳機品牌，專攻中高階及發燒向耳機市場。身邊多位毒友耳機玩家手上的通常都是 Campfire Audio 三對星座作 Lyra II、Orion 及 Jupiter 為主, 。大家都係喜愛 Campfire 的動態強 , 細節分析力佳的聲低，而且菱起角的獨特外觀設計又真係好型, 就係咁………小瑟就入手左一聽傾心的 Andromeda (仙女座) 呢。
讓耳朵來個大滿足 – Campfire Audio Andromeda 五單元耳機開箱+評語
∇ 一開盒, 靚仔到暈的皮套呢。
∇ 仙女就靜靜地等待小瑟開佢苞呢…..@@”
∇ 盒底一張說明書。
∇ 全套開箱後一眼見哂, 耳膠同耳綿之餘, 仲附送一包 SpinFit 耳膠, 正….慳返唔洗再買!!^^”
貴得有道理的『五動鐵單元』+『自家原創技術』
同大家分享一下其規格先，仙女為高階取向，搭載五組的動鐵單元，並經過其自家研發的 Tuned Acoustic Expansion Chamber™ (TAEC)技術, 據說能有較帶出其清澈自然通透的音色。小瑟真係好鬼鍾意其墨綠色的機殼設計, 物料為 CNC 鋁合金物料製造，感覺極度硬朗，未上耳機都擔心會唔會上耳後唔舒服, 但出奇地又冇呢個感覺之餘, 仲好 FIT 耳。 Andromeda 與 Orion 及 Jupiter 一樣，每對耳機均於美國全人手製造。Andromeda 沿用了 Jupiter 的「無導管金屬共振腔體」設計，並由 Jupiter 的雙開孔設計改為三孔設計，令 5 組動鐵單元均能將動態直接傳送至耳內，量感和衝擊力亦更直接到位。
∇ Andromeda 用上「無導管金屬共振腔體」三孔設計，令 5 組動鐵單元均能將動態直接傳送至耳內。
∇ 物料上，Andromeda 用上寶綠色的 CNC 加工鋁合金製造，再經陽極化處理以加強塗層的剛強性。據知此耳機的外觀設計除了是要保持系列的一致性外，亦有效降低諧振和減低失真的妙用。
∇ 既然係 ALO Audio 旗下的耳機品牌，Andromeda 耳機線一定有返咁上下, 可換式接線, 型號為 Litz Cable, 為四芯導銀銅絞合設計，並以抗氧化醫療級 PVC 膠套保護，MMCX 接頭則是以鈹銅製成, 老老實實, 真係未聽聲都覺唔打得都一定睇得^^”。
二種不同風格的聽感分享
講咁多技術野都係虛野, 耳聽為實最有用, 小瑟手上剛好有部 FIIO X5 III, 就用國磚對一對仙女究竟會出到咩效果先. 如果有試過 X5 III的版友都應該會對X5 III 果份甜味記憶尤新, 小瑟用佢來聽多年偶像宇多田光的新歌《道》, 首先一開聲的電子音樂中, 都不難聽到一份音樂中的飽滿感, 小瑟覺得仙女出的聲底係偏暖的, 幾岩小瑟聽, 而且雖然佢係五動鐵單元都好, 但絕對唔會有高音搶耳這些問題存在, 尤其係佢快收放而有深度的低音最為令小瑟印象深刻。再來同大家試下低頻炸機系列先, 銀河守衛隊2的片尾曲《Guardians Inferno (feat. David Hasselhoff)》呢首歌如果大家都有套電影, 應該都會覺得好正. 一開始的 Disco 音樂有層次但未算可以令小瑟有一齊 “UN” 的感覺, 反而 David Hasselhoff 一開聲, 成個氣氛就返返來, 即時好 “UN” 左好多呢.
Conclusion : 「配合靚仔訊源可助聽感有更大的滿足!!」
寫呢篇分享之後, 其實都聽過好多不同的Source, 有LG G6, iPhone, 手機+耳擴, DAP等等, 一個必然的感覺就係 Andromeda 一點都唔難推, 係好易推動岩音亮的耳機, 除左易推之外, 仲可以推出幾唔錯的音色, 尤其當音源Source夠靚仔既時候, Andromeda 更加可以將你的聽感來個大滿足, 佢唔會著重係邊一個頻段去突出其性格, 反而佢會做好三頻中的每個細節, 盡量將平衡度提升之餘保持返每個細節應有的音色. 依家小瑟反而係煩緊為佢配一條什麼樣的 2.5 平衡線好, 始終 DAP 的平衡位置應該都可以將 Andromeda 再帶上另一個層次呢。
售價：HKD$8,980
查詢：ECT(3188 0767)
