本地人人都喜愛男團 Mirror 宣佈終於都會係 1 月 17 日推出《MIRROR“ONE & ALL”LIVE 2021》演唱會藍光碟套裝，套裝以雙碟形式推出，隨盒附送一套兩本的珍藏版相冊，相信係呢二十年來最具珍藏價值的藍光演唱會影碟！但呢幾年來大家都已經對於”光碟”一詞非常陌生，相信九成鏡粉同前夫前妻都冇碟機好耐了。所以我地身為香港影音資訊網站，又點可以唔同大家分享一下依家香港買到又可以完美播到藍光影碟的播放機有咩選擇呢？😋
入門級藍光機好處是其播放系統有機會已整合上 Netflix 及 Youtube 程式，即使大家所用的電視機不帶作業系統，或不兼容相關程式，大家都可直接利用藍光機内的程式播放！當中更有部分進階型號可支援 Netflix等輸出（歐美地區限定），在使用上更為方便！ 今次我地就在本文中為大家整合了多部功能各有可取，而且聲畫表現同樣有水準藍光播放方案給大家，方便大家一文總覽整個揀選脈絡！
最抵玩入手1080p藍光機 ：Sony BDP-S1500 （Price.com報價 : HK$530–980)
首先要介紹的一定係價錢最親民，品牌又大的 Sony BDP-S1500 啦，就算冇優惠價，官方定價都只係$880蚊，已經可以聽到 CD，睇到 DVD，Blu-ray 影碟。仲可以將大家現有的 DVD 影碟由標準解析度升頻至接近1080p全高清解析度，讓你可享受無比真實的精緻細節。而且 BDP-S1500 尺寸亦非常小巧，只有23厘米 (9.1″) x 3.9厘米 (1.5″) ，對於本身冇咩位置再放多部機的朋友來講。絕對係非常實用的一部1080p藍光機碟機。不過因為呢部只係一部支援 1080p 的藍光影碟，所以如果你家中已經有 4K 電視的朋友，就未必可享受 4K 畫質帶來的細緻度了。
日系大廠另一1080p藍光機選擇：Panasonic DMP-BD84 ( Price.com報價 : HK$598–839)
同 Sony 差不多價位的當然有另一日系大廠 Panasonic 的出品，Pananonic DMP-BD84規格上一樣可以播放 Blu-ray，DVD以及播放 CD唱片，而且還可透過USB外接硬碟播放影像及音樂，但當然影片規格有一定的限制啦。尺寸方面 24cm x 17.5cm，呢部亦都係一部 1080p 藍光機，所以功能上會比較單一而且解像度都只1080p，如果你已經換了4K電視那就要好好考慮一下了。
😆想玩好小小的前夫們，機會來勒！！！
前夫們：今次係你地揚名立萬既好時機了，今次如果選擇得宜的話，隨時可以成爲 2022 年度最佳自肥計劃！而本文我地會為大家釋述購買藍光播放機要點，除基本播放功能，大家仍需要留意藍光機其他附加功能，以免得物無所用！雖然主流的演唱會屬於 Full-HD (1080p) 全高清藍光碟格式，但避免 1080p 訊號在 4K 電視上有起格的風險情況，所以最簡單的做法仍然是入手一部具備 4K 影像增線功能的 4K 藍光機，以策安全！如果你未買4K電視的話，今次就正好係一個機會可以順手升級埋你的電視去4K解像度的電視呢！！！ 有咩原因比起要睇清楚 Anson Lo 咁快速的舞蹈同阿姜咁有個性的精彩舞姿呢？有部4K電視就可以睇得更清楚，睇得更大呢。（雖說隻碟都係1080p，不過升頻都真係可以有幫助呢個又係真的呢。🤣🤣🤣）
兼容性方面，4K 藍光播放機除了是能讀取 4K 藍光影碟，更能讀取 1080p 藍光及 DVD 影碟，值得一提是 4K 碟本身沒有鎖區，但港版藍光碟則屬於 A 區，雖然今次 Mirror Live 是沒有區碼之分，但將來你都會有機會買入其他影碟。因此小編不建議在未經考究情況下購入其他地區（俗稱水貨）的藍光播放碟機，以避免讀取問題及電壓不穩等隱患！接駁方面，一般藍光機（或 4K 藍光機）只提供一組 HDMI 輸出，以直駁電視或 Soundbar 播放系統，未必會提供光纖或 RCA 音效接駁，對於最低階的 Soundbar 用家來講，可能會構成不便。若大家無意為接駁問題而升級當前系統的話，請緊記要先確認藍光機的接駁支援規格啦！
4K電視之選，平衡度最高：Sony UBP-X700 ( Price.com報價 : :HK$1,948–2,390)
SONY 是繼 Panasonic 後，又一同時參與電視機及 4K 藍光機生產的電子品牌！除聲音及畫質的調整較貼近電影工作室的參考規範，Sony 4K 機在操作反應、影碟讀取效率及影視功能等反應亦相當齊全；除影碟播放，Sony 4K 藍光機另一大特色是音樂播放方面的表現力壓其他同價位同類產品，而 UBP-X700 亦保留了同軸數碼輸出，若大家之前已前正物色聽歌睇戲兩用碟機，UBP-X700 可謂是一鷄兩食之選！
多功能先決：GIEC BDP-G5500 增強版 ( Price.com報價 : HK$1,980–6,000)
針對影音玩家，GIEC BDP-G5500 (增強版) 在功能上是最齊全的一款選擇，除配備常規 4K UHD藍光機的播放規格如 HDR10、Dolby Vision、4K HDR/60Hz 外，更能支援全區藍光播放、外掛字幕及支援現行所有影片格式，而官方定價仍維持在二千元左右之範圍！更方便是它能支援全區Blu-Ray藍光及全區 DVD，更可直讀硬碟或 NAS 内所有格式影片備份！雖 BDP-G5500 並不支援 Netflix 及 Youtube 播放，但以實體碟為主食的玩家，能支援外掛字幕可謂是一件致勝法寶，值得對影音規格有一定研究的玩家多加考慮！
畫質為先：Panasonic DP-UB450( Price.com報價 : HK$1,925–2,180) / DP-UB320( Price.com報價 : HK$1,590–1,678)
Panasonic 的 4K 藍光機在畫質上一直被坊間好評，當中旗艦型號 UB9000 更一度成爲繼 Oppo 205 後的 4K 藍光機王，廣範被發燒友激讚！雖香港代理信興未有引進任何中高階或以上的 Panasonic 4K 藍光機型號，但對於一般用家，Panasonic 入門 4K 藍光機的最大優勢仍然是其極高畫質表現，能足本展現 4K 畫質之餘，更可將 1080p 訊號增線至媲美真 4K 的畫質效果，對於鍾愛玩大畫面體驗的玩家，Panasonic 的 4K 藍光機可謂是一件恩物！ 至於港版行貨則共引進了 3 款 4K 藍光機，當中 DP-UB450 則交為影音玩家取向，能足本對應 Dolby Vision 及 HDR10+ 影像格式輸出，而 DP-UB320 則相對應用取向，已整合 Netflix 服務功能，較適合初階玩家。針對對畫質有要求的玩家，Panasonic 可謂是超性價比之選！
打機友恩物 ＋ 高影音規格主機：XBOX Seris X （官方零售價: HK$3,880）
對於過去沒有添置過任影碟播放裝置的心急人，入手 XBOX Seris X 可謂其中一個最能自肥的方案！除了能對應最新的 HDMI2.1 規格的 4K/120Hz 遊戲，XBOX Seris X 更即將可透過升級支援 Dolby Vision 高畫質遊戲，簡單解決上最基本的日常娛樂需要！睇戲方面，XBOX Seris X 在睇碟時能對應 HDR10 及 Dolby Atmos 輸出，至於睇 Netflix 及 Disney+ 時更能輸出 Dolby Vision 及 Dolby Atmos 規格，以新時代遊戲機而言已是頂級規格！ 非常適合成爲自肥計劃首選方案之列！
打機友終極自肥方案：PS5 ( Price.com報價 : HK$6,750–8,998）
長期受缺貨問題困擾的 PS5 幾乎每日都是遊戲界的話題！相比 XBOX Seris X，PS5 在影音規格的支援上則較爲遜色，只能在播放影碟狀態下輸出 Dolby Atmos 音效，其他串流方案包括Netflix及Disney+以及打機時亦只能輸出基本 5.1 音效！而畫面方面，PS5 雖能對應 4K/120Hz 輸出，但 HDR 顯示方面卻只能清一色只支援 HDR10，在多功能支援方面的確比較弱弱的！但因為PS在遊戲方面一直都係香港打機友的主食，所以作爲以遊戲為主，影音為次的玩家們，PS5 依然是每位前夫最夢寐以求的＂睇Mirror Live” 最佳方案！
Conclusion：「努力呀Mirror，期待你地為香港出現更多不同的奇蹟呀！！😎」
多年來，藍光碟都未算有正式在香港興起過，更莫講4K-UHD影碟這個”東西”呢，今次 Mirror 們推出佢地九展的演唱會，估唔到可以掀起這個影音界的滔天巨浪，而且在版友的討論中，大家都對於呢個現象有非常正面的看法，期望可以將影碟市場激活一下，長遠會否可以讓”買碟＂這個史前的文化帶回香港這個地方呢？我們當然希望可以出現啦。而我們都建議 Mirror 的團隊可以考慮一下將佢地在 Youtube 上的多個 MV，官方影片都可以好似以前日本偶像的出多一點點的影像產品出市場，而且CD唱片都可以再出一個MQA版友，或者SACD版本，讓我們都可以提升香港人對於影音要求的水平，真的不太希望香港的影碟鋪依然最好賣還是DVD，最多人聽的還是手機MP3吧！！！
