上星期有幸同小瑟出去開會傾活動，小瑟就話︰「odin，帶你上一個地方」，當我以為大王會賣左我果時，點知原來佢帶我上Onkyo，近來好小玩AV嘅我雖然唔多感興趣，因為AV唔係用黎玩，係用黎…….但作為76版主一定要捨命陪君子啦，大王識埋識埋咁多靚靚PR，或者！或者佢會介紹比小弟識下，然後個靚靚PR又愛上左我，咁我就日日有美相伴，夜夜有機聽啦，或者夜夜有……當我諗野諗到入晒神，口水都流埋出黎既時候，大王好大力係我膊頭拍左一下，當堂醒晒，回一回神之後就見到Onkyo就有個姐姐仔拎左「隻野」出黎，仲要係紫色兼有金屬紋，原來係新款耳機。
大王問我未問我既時侯，我就厚住面皮問人借黎玩啦，好多人以為版主借野玩一定要寫膳稿，其實依家D代理好好，純粹係想知道玩家評價，既然無壓力，唔拎佢最貴果隻走點對得住自己，於是我隨手就拎左隻ES-FC300 + 埋條HF300既耳機線走人勒。
點解主題要叫Onkyo ES-HF300、ES-FC300 耳機雙雄呢？原因好簡單，雖然佢地係二個不同型號的耳機，不過其實佢地機身其實係一樣的，二個型號分別只在於耳機線，ES-HF300 售價為HKD$1,480，ES-FC300售價為HKD$1,260，ES-HF300特別之處在於其原裝配備有 6N 純度 OFC 的 1.2m 銀色銅線，能夠大大減低雜音的干擾，聲音純淨音染少，令輸出的音效更原汁原味。而ES-FC300則配備 1.2m 扁身防纏耳機線，用上金色的 MMCX 插頭。
忍唔住係車上面就拎佢黎聽，外觀上非常靚仔，帶上頭亦都幾舒服，個人好鐘意佢隻線，除左夠硬之外，線個外觀都好「型」，用MMCX頭，即係同Shure耳機同樣既頭。由於今日無帶我套「炸彈」組合出街，PHA-1又還返比人，唯有用人人都有既Note 2 直推，同佢試聽Eagles Hotel Califonia，發現呢隻野聲音好有個性，本來以為鈦單元應該玩分析力，應該聲音明亮，結果發現ES-HF300聲音走向同預想不同，ES-HF300係玩耐聽，暖聲底、音牆闊、動態大、低頻有力，聲音走向似Onkyo mini hifi，有點懷舊味道。
咁你地一定會問，odin，我唔要聽你up廢話，到底隻野得唔得?通常我都會回應，每件產品都有佢定位同市場價值，玩機理論上應該多留意佢特性同優點，仲要自己試聽，缺點呢！當然有，應該係話每隻機都一定有，ES-HF300缺點係聲有D緊，中高頻伸延比較平淡，人聲不夠明亮，分析力一般，但好可能係因為佢「未開聲」，不過從聲底推斷，ES-HF300係比較適合聽POP Music，但如果你鐘意人聲小品，或者係大棚野，ES-HF300就唔太適合啦。
作為76版主，我會提醒自己，耳機知識唔一定要好豐富，但評價一定要公道，雖然在我評測下ES-HF300有優有缺，但自問一星期時間未能玩好ES-HF300，除左未開聲之外，亦未能在線材上作配搭，以ES-HF300的價格及定位來看，應該係Target入門玩家，如果你係新手，可以參考小弟文章自己去試聽一下，如果你係老手，我會推薦你拎「一至兩萬」衝隻頂級野玩，從此無得身痕，咩話?你版主毒人?一入鴻門深似海XD，你唔係預左咩！
＞
歡迎進入我們的影音玩樂討論區發表意見.
https://post76.hk/forum.php
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
