今日係 KEF 方面正式發布其新出的耳機日子，小瑟有幸可以係早二個星期前，已經收到全新的測試耳機，讓小瑟有機會可以一次過就親身測試呢二款又型又款既耳機，首先小瑟會同大家分享既就係呢隻頭帶式的 M500 耳機先。依家就先同大家整個開箱文先啦！
值得一提是，即使你要出差到外地，M500 既配備既耳機保護套設計都幾方便，又細隻同埋好好保護耳機。M500 設計都係以適合於市場上大多既智能手機、電 腦或其它移動設備，1.3m 長既防抖結扁線上，附帶一個 MIC 遙控，全線配上鍍金接頭，適用於 iPhone 以及其它 Apple 電子產品，而經小瑟測試，手上的 Sony Xpria Z 可作出聽電話及暫停聽歌之操控，但調校音亮就對應唔到勒。
一套四件，比手機用既接線，直駁冇手機 MIC 的接線，細轉大頭同一個係飛機上用既插頭，明顯地，呢個設定係照顧到好多成日要飛來飛去既商務人員都可以有一套高質而又有品味，最緊要係對音樂有要求的用家啦。
技術規格
頭帶式 M500 耳機採用了 40mm 全音域動圈單元，配備有經細心調校的高品質輕量 CCAW 銅鍍鋁線音圈，僅為傳統銅線一半重量，在提升高頻延伸同時增強了解析力。 M500 的頻響範圍為20HZ～20KHZ，靈敏度有 103dB，阻抗是 32±15% Ohm。配有線長1.3m的信號線和備有麥克風線控功能。重量為 208 克。
外觀寫真
外觀上，雖然 M500 屬於金屬框架，但並唔重身，耳機既主框部分屬全鋁打造，配以防汗透氣耳墊同頭帶，而表面有磨砂處理，所以在手感、質感上都份有一份高級耳機的貴氣。另外一體化的耳罩設計擁有嚴密的聲學密封性，雖然耳罩唔係成隻耳仔蓋住，但漏聲問題都唔算明顯。此外，鋁制框架再搭配埋透氣抗汗記憶棉耳墊，小瑟試過聽過二個鐘頭音樂，都唔覺得夾耳，如果你好鐘意長時間聽音樂既話，都唔會感覺難受呢。M500 係框架設計上使用了名為「Smart Hinge」 多角度調校設計，可作出多方向靈活折疊旋轉，聲稱可配合不同大小頭型及可完全緊貼頭部，小瑟頭型唔算大，不過帶落呢隻耳機的確係幾舒服同唔會有悶熱既感覺，當然，如果夏天你要帶M500出街的話，就點都冇可能唔辛苦架勒!!!!
實測開始
小瑟手上來了一部Ak100，此機勝在方便，力水亦算可以，音質在同類產品中比小瑟感覺係＂靜＂，所以用佢來先測試一下究竟M500對於音色上的表現會係如何先？先試一首【張學友 – 有個人】中第7首的【 愛你愛到不知痛】，唔知有幾多人同小瑟一樣，都好鐘意囉呢首歌來作測試的呢？貪佢錄音靚，動態強。用Ak100來推隻M500，基本上用到63度音亮已經夠聲，一開始時快速鋼琴聲的背景，背景都算係幾靜，人聲方面，又唔係小瑟想像咁厚底，係清脆小厚一類，低頻鼓聲分析力都唔錯，每下低頻中只有好輕微的痴地，M500音樂性格唔係埋身型，三頻非常平均，冇話偏埋任何一邊。
之後再來一首2012年推出的【菲賣品(K2HD)】中的【執迷不悔】，呢個版本絕對正斗，編曲全新，一開頭的結他位絕對清新，再來一炸快鼓，以 M500 演繹出來有條不亂，而亞菲把聲唱出來 Hair 得來好有味道，好清，好立體，結他的配樂絕對能做出其畫龍點睛之效，帶起到整首仄的氣氛呢。而整體來講，M500 其平均而不造做的音色取向，係可以另大家原汁原味地好好欣賞音樂呢。
手機 Sony Xperia Z 直推
再來就試下用手機來直接推動呢隻M500，究竟又會有咩效果呢?? 係推力上，Sony Xperia Z 唔算係好好力水既一類，而小瑟係需要將音亮去到九成位置，先可以有平時聽開歌既清晰同到位既音亮，而一曲【愛你愛到不知痛】在分析力及低頻控制都尚算理想，而就算只係用手機來直接推隻 M500，M500 都可以提供到唔錯既立體感同樂器分離度既仔細位，最後，小瑟仲不知不覺地將音亮推到頂點先可以聽返平時小瑟＂炸＂開機既音亮，咁即話其實隻 M500 都係需要返一定既力水先可以好好咁控制得佢貼貼服服呢。
總結小評
貴為KEF頭炮推出的耳機，係外型上絕對睇得出係以高貴專業行先，而此耳機的官方定價為HK$2,680，實在令人入手意欲大增呢。而音色方面其實都同 KEF 的喇叭都係同出一門，以平衡干淨為主，而值得一提既係，小瑟係岩岩開聲時耳機出來聲音的平滑度及低頻既彈跳性與煲左30小時左右之後，已經有著非常非常顯著既提升，小瑟都好希望可以煲多小小時間，不過呢件玩具小瑟就會交比特攻隊員玩下，獨樂樂不如眾樂樂丫麻。
＞
歡迎進入我們的影音玩樂討論區發表意見.
http://www.post76.com/x2/forum.php?mod=viewthread&tid=157598
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
