不經不覺,o係76已經一年了!呢一年裏面,見證住76大大小小o既變化,當中有開心、有興奮、有失落、有無奈,有值得驕傲o既、亦有令人忿怒o既,而且,令我獻出咗好多個人生o既第一次……
反正無聊,就藉住呢個機會,同大家回顧一下,分享一下感受……,唔知當中大家又記得幾多呢?
(如果大家同我一樣都咁無聊,一看無妨;覺得我無聊o既,唔睇亦無損失,呢個就係吹水區可愛之處)
2008年10月4日
都記唔清楚點樣誤打誤撞,樁咗入嚟,仲註埋冊;記憶中,俾law兄o既家庭影院吸 引住(當時仲未落權限),簡直眼界大開,無得頂!而且,好容易就感受到,呢度和諧、同互相幫助o既氣氛;當時,人流並唔多,三幾日上嚟一次,都可以追得晒 D POST,上嚟上得好輕鬆,所以,俾我留意到一樣嘢:有一位會員,經常會用隱身身份出現,如果我無估錯……應該係……w兄吧?
我仲記得你果三架車仔嫁!
頭幾個月……我無乜點發言,因為齋睇已經夠興奮,又硬件區、又軟件區、又吹水區(當時都未落權限),仲有影音入門小知識添,喂~!我真係有睇嫁!你見我頁面訪問量就知啦!既然呢度咁多人用心回帖,睇吓睇吓,就出咗我第一個POST,到咗2月,換咗幾樣器材之後,仲膽粗粗,POST埋我套19家庭影院上嚟添,自此之後,就漸漸開始我o係76搭o爹o既路程……
12月2日
影音器材二手買賣區開張大吉
post76六周年版聚
初嚟報到,諗住三九唔識七,所以無報名
但係如果無記錯,初頭好似話去水車屋,唔知點解改咗?
2009年2月13日
第一次官方團購
有幸參與其中,第一次見到網主小瑟,興奮莫名!
2月17日
MOVIE 電影討論區開張大吉
綜合二手買賣區開張大吉
2月28日
大當家生日
生日快樂~
3月7日
版聚第一回:DIY 電源線版友分享及新手研集班
雖然抽唔到時間參加,但係都感覺到無比興奮!
3月12日
POST76榮譽選舉
3月20日
團購專區開張大吉
3月26日
版主招募
曾經都諗過申請,為76服務吓,不過因為<對所申請的版面主題必須要有一定認識>,所以打消咗念頭,如果將來有個職位係”科林打雜”,我到時一定申請!
3月30日
Roy的HiFi家訪世界開張大吉
5月3日
燉冬菇事件
表面上唔係人人有份,所以唔係個個知
5月5日
勛章推薦區開張大吉
5月8日
第一次學人搞團購
多方面未能盡善盡美,而且供不應求,唯有’懶’係包送貨以慰藉大家,多多包涵~
5月13日
飲和食德開張大吉
電玩天堂開張大吉
5月18日
受勳日
首先一定要多謝o既係提名同出力拉票o既aegysd,跟住要多謝o既係頒獎o既小瑟,最後當然要多謝咁多位投過票,同埋趕唔切投票o既朋友!
6月5日
第一次私聚
初時講到眉飛色舞,點知最後得返三丁友,不過好高興識到maner同線王,兩條友真係好吹得,令我獲益良多,可惜往後每次食麵都搞到我鬼咁夜,返去俾人鬧……
6月10日
<黃家駒先生>四十七歲冥壽
同76無乜關係,但係一定要講!
6月11日
版聚第二回:76與你試盡安橋新世代高清擴音機
第一次參加版聚,能夠早於開SHOW之前,參觀準備o既過程,學到好多嘢!
6月19日
得利xPost76藍光專區開張大吉
6月30日
<黃家駒先生>逝世十六週年
同76無乜關係,但係一定要講!
7月13日
版聚第三回:得利 x 76優先試影會-港版藍光<地球毀滅密碼>
7月18日
版聚第四回:高清打機演試會
本身都鍾意打機o既我,請假都要參加今次版聚,o係大畫面之下打機,的確非筆墨所能形容
8月4日
76特攻隊成立
8月14日
POST76登陸FACEBOOK
向世界出發~~
8月15日
版聚第五回:Klipsch 新系列 – Icon W 率先震撼全接觸測試會
8月29日
版聚第六回:高清影音調校入門心得分享會
學到調校o既重要性,一個好有意義o既分享會!
9月9日
雙線群英會
又一次吹水吹到唔捨得走o既一晚
9月12日
版聚第七回:Pioneer 912 雙龍匯
9月30日
更改版面
令人值得回味o既,當然唔只咁少啦!例如仲有:我最喜愛Post76藍光碟2009終極選舉,得利影視同POST76正式合作,新力影視向POST76提供新碟資訊,Pioneer HK 邀請 post76 出席產品發報會,鉅星錄像向POST76提供新碟資訊,[版務改革] 新版主制度改革,Post76 x MoviEx 網上租碟優惠計劃……等等.
76呢一年真係百花齊放,一年就有咁o既成績,全靠各版管同各版主o既努力,大家先有一個咁美好o既溝通平台,請准我說聲:真的愛您~!
係時候總結一下,經過咗呢一年,我體會到幾樣嘢:-
版聚:
有時間一定要參加,可以見識更多之餘,又可以一睹各高層o既風采,更可以雲集一大班師兄弟,高談闊論一番,人生一樂也!
團購:
負擔得起要參加,難得有人奔波勞碌,為我地刮盡天下筍價,大家只需安坐家中,按動電腦,就可以選購物超所值o既產品,人生二樂也!
家訪:
家訪要參加,家訪又分為大搶同細搶;大搶:可以聯絡avmilk,成功申請後,會有一班非專業人士,幫你做一D好專業o既調校,有調音師、有調畫師、有攝 影師,最後仲有埋報告,務求做到盡善盡美.細搶:可以聯絡線王或者maner,唔需要點申請,只要就啱時間,約好日子,就會有一班蛋散,上嚟幫你做一D無 謂o既調校,無調音師、無調畫師、無攝影師,當然亦唔會有報告,務求踩完場就算.但係,無論大搶定細搶,都會盡量幫你搵出你套嫁撐o既不足之處,就算搵唔 到,能夠聯同三五知己,大談影音心得,人生三樂也!
最後:
當然就係上多D 76啦!76無分男女老幼,76無分高矮肥瘦,只要你對吃喝玩樂有一份熱誠,76都會歡迎你,一個全香港最和諧o既影音玩樂網站,能夠置身其中,人生四樂也!
好喇……你能夠睇到呢度,只可以證明一樣嘢……原來你同我一樣咁無聊,既然咁有緣可以o係度相遇,我就祝大家身體健康,繼續開開心心上76;明年今日,如果大家仍然活在無聊當中,吹水區見~!
