【家訪】新鮮熱辣的 kakamoming 影院

呢日, 我地去到九龍灣港鐵站, 呢個人來人往既德福廣場, 就係應會員 kakamoming兄既邀請, 去其新鮮熱辣, 岩岩建成冇耐既家庭影院, 幫幫手去做小小設定同埋分享一下小小調校上既心手, 而我地就係係度等 kakamoming兄帶我地架勒.

今次, 除左小瑟之外, 仲有我地行動組版主245141525(祺哥), 我地更加請多個擁有ISF同THX認證既版友, AVABC一同上去, 希望可以幫kakamoming兄既家庭影院, SET得好D, 同埋可以學下野咁啦. 好, 我地一齊黎睇下kakamoming兄屋企既器材列表先丫!

要求調教器材:
電視機 : PANASONIC Plasma 50″ V10H
AV擴音機: PIONEER SC LX-73
藍光播放器: PS3 slim & Pansonic BD45
前置喇叭: Focal Chorus 816V
中置喇叭: Audio pro image 21
上前置喇叭: Audio pro image 11
後置喇叭: Energy RVSS
重低音: M&K KX-12

我地一行三人係德福既麥當勞等齊哂之後, 就浩浩蕩蕩咁殺上去勒, 此行小瑟都學都好多野呀, 首先學到原來德福除左係一個私人屋苑之外, 原來仲有一部份係屬於政府宿舍來既, 而我地今日既主人翁 kaka兄, 就係屬於政府既公務員來, 仲係可以享有呢D咁正既福利既公務員, 小瑟真係冇諗過, 原來係德福度, 都有呢D正既事可以發生, 小瑟真係好後悔當初點解唔好好讀書, 加入政府機構, 當一個政府公務員, 如果當日小瑟好好讀書, 今日就唔洗捱貴樓呢………..一_一”””

家庭影院既靈魂人物重任, 就交比 PIONEER SC LX-73負責勒.

而藍光碟播放就交比 Pansonic BD-45, 而佢夾埋Panasonic PLASMA, 畫汁來講基本上都冇咩好投訴了.

kaka兄都係打機之人, 所以都會整返部 PS3 Slim來招呼朋友同平時娛樂之用既.

跟住就要介紹以下部機勒, 佢係一部MEDIA PLAYER來既, 呢部機kaka兄係DVD年代用來比佢既屋企人睇DVD電影既, 不過呢OLEVIA品牌既出品已經係N年前既產品, 仲係未能支援高清影像添既, 咁點解一個咁高清既家庭影院仲會有部咁陳年既古董呢??? 咪就係一字咁淺, kaka兄”念舊”囉~~~~XDDDD (kaka兄, 呢段記得cap比亞嫂睇呀~~XDDD)

好勒, 返返來先, 呢對連紙套都未開, 新鮮到不得了, 又高大英俊既前置喇叭, 我諗都唔洗小瑟多介紹勒, Focal Chorus 816V 相信唔小聽過佢唱歌炸戲既朋友, 一定會比佢深深吸引住呢.

而中置就係用上 Audio Pro Image 21, 咪睇佢身形細細, 佢出既人聲對白真係清晰有力, 爆炸場面都可以應付有餘架喎!

係一個家庭影院既基石, 又點小得超低音SUB仔呢個咁重要既角式呢?? kaka兄既 SUB仔就係網上網下都非常之好評既 M&K KX-12勒. 我地見到 kaka兄已經以back fire方式放置好勒.

鏡頭一轉, 我地轉戰後方, 一對後置喇叭 Energy RVSS就係梳化既左右位置上方.

好勒, 逐件野同大家介紹完勒, 係時間正式開始一下要做既野勒!!!!! 好, 起動~~~^_^

好勒, 羨慕完人家一輪, 又同大家睇過哂器材既寫真之後, 我地就正式黎到kaka兄既家庭影院核心地勒, 首先我地當然係聽下現時 kaka兄既設定情況先啦, 一黎我地就開左 kaka兄都幾常睇既 Eason DUO 藍光演唱會先, 就畫面來講, 因為Panasonic V10H既色溫同畫質上, 其實係預設上已經非常準確同埋討好, 所以在場我地只係睇睇一D基本設定有冇攪錯就OK了, 好似好多人都會SET錯既全屏點對點, 呢D通常都好多師兄係設定時都會攪錯, 因為呢個點對點功能如果SET唔岩, 好似ZOOM咁, 雖然個畫面就會放大左, 填滿埋電視則邊既黑位, 不過咁係畫質上, 因為已經唔係點對點既效果, 就始終對畫質會有一定既壞影響呢.

好, 係聽完同睇完一首歌既時間之後, 我地發覺喇叭7隻喇叭既連貫性有小小問題, 而高音上亦都有小小過火既感覺, 包圍應亦有小小不足, 而最明顯既係就低音, 以KX-12既體能, 應該係可以做出更強而有力既低頻同埋應該可以將整個影院既氣氛更進一步. 係我地聽過 kaka兄本身既設定之後, 我地就開始著手攪野勒, 首先, 咩都係假, CHECK哂全部器材既電先, 睇睇有冇反相情況先, 因為如果器材電位反左相, 基本上就做咩都好, 一定會事倍功半既, 所以係一開始之前, 我地就囉哂D電源出黎, 逐個睇睇相性岩唔岩先!!

我地呢日仲帶埋一條反左相既電源線出黎, 睇下如果 kaka兄真係有器材有反相既問題, 就囉佢來轉換一下, 不過非常之好既係, kaka兄既全屋所有器材既電源線既相性都岩哂, 所以呢條野就用唔著勒~^^”

電源確定冇問題之後, 當然就係開始同部LX-73做熱身同設定勒.

另外值得一提既, 就係究竟度距離時, 究竟係應該以喇叭既邊個位置來做一個準則呢??? 其實我地因為人耳對高音既方向性係最敏感, 所以我地係度呢D尺寸時, 應該係以高音單元為標準既.(大家唔好睇圖呀, 因為張相係我影快左既~~XDDDDD)

而小瑟個人既小小建議, 就係如果想做得更好, 後置喇叭既高音單元應該向下, 直指皇帝位既人耳位置, 咁就更加好勒.^^”

之後當然就係校聲壓啦. 由於後置喇叭位於比較高同指向唔係直接指向皇帝位, 所以係調校後置喇叭時, 就要係音壓上慢慢咁增大, 令後置音場可以得到更加明顯同充足, 咁環繞聲既效果就可以更加到位呢~~~

係調音壓既時候, 發生左一件好奇怪既事, 就係上前置既喇叭, 無論校到最大同最細聲, 都完全冇任何反應, 之後我地就爬上去CHECK CHECK D接線會唔會有問題啦, CHECK完一輪之後, 都冇發覺任何問題喎, 但好奇怪, 之後再校, 又有返反應, 真係好奇怪呢~~~~XDDDDD

係經過一輪設定之後, 我地就搵左聲畫皆絕既亞凡達藍光來做測試勒. 我地就呢段來講, 反覆試左好多好多次, 原因係因為主角揮動佢枝火捧時, 可以清楚咁測試到整個音場同環繞聲既包圍感同連貫性, 因為整個家庭影院係一個整體來的, 所以係全個影院上既喇叭聲音走位呀, 轉動呀, 都要設定到前後左右上下都係以線性走動既就最好勒, 而係我地攪左幾個鐘之後, 再囉埋其他片源出黎作反覆測試, 最後, 整合音場既包圍同連貫性已經好返好多了, 而 kaka兄對低音都有一定既要求, 不過當日黎講, 雖然用上M&K KX-12呢隻出哂名勁既12吋重低音, 不過唔知點解硬係覺得唔夠喉同未夠力水, 而大家係上圖都見到, 其實隻KX-12都仲係用緊一般既低音線同原裝既電源線, 另外因為SUB仔同AMP既距離都幾遠, 所以SUB仔線基本上都用左差唔多成12尺長既線, 係咁長既情況下, 其實或多或小都對信號有一定既衰減, 所以我地都建議 kaka兄快D同佢SUB仔加D補品, 咁出黎既效果一定會好好多呢!!!!^_^